ՀՀ էկոնոմիկայի նախարար Վահան Քերոբյանն իր ֆեյսբուքյան էջում նախօրեին գրել էր, որ «Տարբեր երկրներում կոռուպցիայի մակարդակի ամենավստահելի ինդեքսը Transparency International-ի կոռուպցիայի ընկալման ինդեքսն է` cpi: Ըստ նախարարի՝ 1999թ.-ին Հայաստանը այս ցուցիշով եղել է 80-րդը աշխարհում, 2008ին` 109-րդը, 2018-ին` 105-րդը, իսկ 2020թ.-ին` 60-րդը, ընդ որում 2019-2020 թվականներին աշխարհում ամենամեծ դրական փոփոխություն գրանցած երկիրն է։ <<Եւ լավ կառավարման արդյունքում` նախկինում տնտեսական աճն ապահովվում էր դղյակներ կառուցելով, իսկ այժմ` դպրոցներ ու մանկապարտեզներ»,-գրել էր նախարարը։
Թեմայի շուրջ «Առաջին լրատվական»-ը զրուցել է տնտեսագիտության դոկտոր պրոֆեսոր Գագիկ Վարդանյանի հետ:
-Պարոն Վարդանյան, ՀՀ էկոնոմիկայի նախարար Վահան Քերոբյանի ֆեյսբուքյան գրառման վերաբերյալ ինչ դիտարկումներ ունեք։ Իսկապե՞ս Հայաստանը 2019-2020 թվականներին աշխարհում ամենամեծ դրական փոփոխություն գրանցած երկիրն է։
-Եթե կարճ, ապա ես որևէ ցանկություն չունեմ կարծիք հայտնել ինչ-որ մեկի հայտնած տեղեկության մասին, որը հասանելի է բոլորին, առավելևս, որ նման տեղեկությունը չի ուղեկցվում որոշակի, մասնագիտական մեկնաբանությամբ: Պարզ ասած, հետո ինչ, որ 2020 թվականին Հայաստանը կոռուպցիայի ընկալման համաթվով զբաղեցրել է աշխարհում 60-րդ տեղը: Ինչու եմ այդպես ասում: 2002 թվականին որակավորման բարձրացման համար մեկնել էի Ճապոնիա: JICA-ի ծրագրով այնտեղ էին նաև Հարավային Կովկասի մյուս երկրների, Կենտրոնական Ասիայի երկրների ներկայացուցիչները, ընդհանուր առմամբ 8-ն էինք: Մի պրոֆեսոր հարցրեց. «Ձեր երկրներում կոռուպցիա կա՞»: Մի պահ խորհրդավոր լռություն տիրեց լսարանում: Հասկանալով, որ «քարկապ ենք ընկել», ասաց. «Եթե հնարավոր է մեկ ծրարով բոլոր հարցերը միանգամից լուծել, ապա լավ է» («մեկ պատուհանի» սկզբունք): Ասվածը, գուցե ճիշտ չընկալվի: Մի խոսքով սրանք «նուրբ հարցեր են:
-Այսինքն կոռուպցիայի ընկալման ցածր մակարդակը մտահոգի՞չ է:
-Ամենևին ոչ, դրա մասին չէ խոսքը: Խոսքը նրա մասին է, որ բաներ կան, որոնց մասին բարձրաձայնել չի կարելի: Կոռուպցիա բառն ինքնին «ուժեղ» բառ է և դրանով հնարավոր է մթագնել մեծաթիվ մարդկանց ուղեղները: Ժամանակին Իսրայելն արտահանել է…«կոռուպցիա» ու զարգացել: Ինչու՞ ժամանակին: Ընդամենը վերջերս, արցախյան վերջին պատերազմի ժամանակ, Ադրբեջանը և իսրայելական ռազմարդյունաբերության որոշ ընկերություններ կոռուպցիայի մեջ թաթախվել էին զենքի և սպառազինությունների մատակարարման հարցում, իսկ մենք կոչ էինք անում Իսրայելին դադարեցնել մատակարարումները. «միամտություն, հետամնացություն, գավառականություն»: Բայց, դրա մասին ոչ ոք չի խոստովանի, չի գովազդի: «Լավ» օրինակ է նաև Հարավային Կորեան, որի անվանական ՀՆԱ-ն 2021 թվականին նախատեսվում է 1.8 տրիլիոն դոլար, մշտապես կոռուպցիոն սկանդալների մեջ է հայտնվում. բարձրաստիճան բազմաթիվ պաշտոնյաների նկատմամբ, այդ թվում նախագահների, կիրառվել ու կիրառվում են պատժամիջոցներ: Դուք կգտնեք բազմաթիվ, գլոբալ բրենդ հանդիսացող ընկերություններ, որոնց նկատմամբ հարյուրավոր, նույնիսկ միլիարդավոր դոլարի պատժամիջոցներ են կիրառվել՝ բացահայտված կոռուպցիոն մեխանիզմներ կիրրառելու համար: Ձեր ասած «մտահոգիչը» վերաբերում նրան, թե այդ ինչպես է պատահել, որ համաշխարհային մասշտաբով ժողովրդավարության բաստիոն հանդիսացող Հայաստանում, այն երկրում որի ոտքերը գնալով «ամպաշաղախ» են դառնում կոռուպցիայի առումով, այսինքն՝ որը կոռուպցիայի ընկալման համաթվով 180 երկրների շարքում 2020 թվականին զբաղեցրել է 60-րդ հորիզոնականը ու ոչ մի ներդրող առանձնապես ոգևորված չէ ներդրումներ անել այսպիսի «դրախտային պայմաններում»:
-Այսինքն, դուք համարում եք, որ դա ոչի՞նչ է ու ոչ մի բան չարժե՞:
Համենայնդեպս՝ դրա մասին են «խոսում» թվերը: Այսպես, ներկայացված գծապատկերներից երևում է, որ թեպետ կոռուպցիայի ընկալման համաթվով Հայաստանն առաջընթաց է արձանագրել, այդուհանդերձ, ներհոսող օտարերկրյա ներդրումների աշխուժություն չի նկատվել:
Գծապատկեր 1. Հայաստանի աստիճանակարգն ըստ կոռուպցիայի ընկալման համաթվի (աղբյուր՝ https://tradingeconomics.com/armenia/corruption-rank)
Այս գծապատկեր մեկնաբանությունն այն է, որ 2020 թվականին, ըստ կոռուպցիայի համաթվի, Հայաստանի աստիճանակարգը նվազել է, ինչը դրական է և ինչի մասին էլ ոգևորված ֆեյսբուքյան գրառում էր արել ձեր նշած անձնավորությունը: Բայց, ցանկալի կլիներ ներկայացնել նաև, թե դա ինչպես է ազդել երկրի տնտեսական ակտիվության, ներդրումների, հատկապես ՕՈՒՆ-ների, ծավալների վրա: Մինչդեռ ներդրումների մասով, կարծես, դա ոչ մի նշանակություն չի ունեցել, ինչի մասին վկայում են գծապատկեր 2-ի տվյալները:
Գծապատկեր 2. Օտարերկրյա ուղղակի ներդրումները Հայաստանում (աղբյուր՝ https://tradingeconomics.com/armenia/foreign-direct-investment)
Ներկայացված գծապատկերից երևում է, որ ՕՈՒՆ-ները նվազման կայուն միտումներ են դրսևորել, սկսած 2008 թվականի ֆինանսատնտեսական ճգնաժամաից հետո: Նշված աղբյուրում հանդիպում ենք հետևյալ գրառմանը. «2020 թվականի չորրորդ եռամսյակում ՕՈՒՆ-ները Հայաստանում նվազել են 2.7 մլն դոլարով»: Անհարմար է, նույնիսկ, դրա մասին խոսելը: Ավելին, չնայած կոռուպցիայի համաթվի դրական շարժընթացին, բավական մեծ անկում է նկատվել ապրանքային պաշարների մասով, ինչը ներկայացված է գծապատկեր 3-ում:
Գծապատկեր 3. Հայաստանի ապրանքային պաշարների փոփոխությունը (աղբյուր՝ https://tradingeconomics.com/armenia/changes-in-inventories)
Գծապատկերից երևում է, որ Հայաստանում ընկերությունների ապրանքների պաշարները 2021 թվականի առաջին եռամսյակում նվազել են 50 միլիարդ 91 միլիոն դրամով, ինչը մտահոգիչ է. փաստորեն, շրջանաու միջոցների առումով, այդքանով նվազել է կապիտալի կուտակումը:
Մինչդեռ, օրինակ, ներդրումների մասով Ադրբեջանում, 2020 թվականի 4-րդ եռամսյակում ՕՈՒՆ-ների աճի կազմել է 1.1 միլիարդ դոլարից ավելի, չնայած ըստ կոռուպցիայի համաթվի, Ադրբեջանը զբաղեցրել է 129-րդ հորիզոնականը: Այսինքն, կարծես, ներդրումներն ընդհանրապես չեն «վախենում» կոռուպցիայից:
-Բայց, կարծես, այս պարագայում ոգևորվելու առիթ կա. 1999 թվականի 80 –րդ հորիզոնականից Հայաստանն իջել է 60-րդը, էլ չասենք նախկինների ժամանակ, տարիներ շարունակ մեր երկիրը չէր իջնում 100-րդ հորիզոնականից ցածր:
-Այո, աստիճանակարգերին նայելիս, դուք ճիշտ եզրահանգում եք կատարում: Բայց, այստեղ մի նրբություն կա. կոռուպցիայի ընկալում: Կոռուպցիայի ընկալման համաթիվը որոշվում է փորձագիտական գնահատականների, հանրային կարծիքի հարցման հիման վրա: Կոռուպցիայի ընկալման համաթվի առումով՝ կոռուպցիան սահմանվում է որպես «վստահված իշխանության չարաշահում՝ անձնական շահի համար»:
2020 թվականին, իրապես, Հայաստանի հայտնվելը 60-րդ հորիզոնականում, աննախադեպ էր անկախությունից ի վեր: Միաժամանակ դա կարելի է բացատրել , հանրության ընկալման տեսանկյունից: Պարզ ասած, եթե նույնիսկ, հանրությունն «իր աչքերով տեսնի», որ ներկա իշխանության ներկայացուցիչները «բեռնատարներով փողեր են կրում» կենտրոնական բանկի պահոցներից կամ բյուջեի փողերն են տանում, աջ ու ձախ փոշիացնում են պետական ունեցվածքը, միևնույն է չի հավատա, ինչպես որ արցախյան վերջին պատերազմում հազարավոր հայորդիների զոհվելը, Արցախի փաստացի կորուստը, ազերիների կողմից ՀՀ տարածքներով ասպատակելը որևէ անհանգստություն չեն առաջացրել: Այսինքն, եթե մարդն ինքն իրեն ներշնչի ու տրամադրի ոտաբոբիկ անցնել շիկացած ածխի վրայով, նա ոչինչ չի զգա:
Միայն մեկ, օրինակ, 2018-2020 թվականներին պետական հիմնարկների վերջնական սպառման ծախսերը տարեկան ավելացել են 100 միլիարդ դրամով: Վերջնական սպառման տարեկան միջինը ծախսերը կազմել են 834.7 միլիարդ դրամ, այսինքն՝ Քոչարյանից 4.6 անգամ ավելի, իսկ Սարգսյանից 56.1 տոկոսով ավելի: Հիմա, սա կոռուպցիոն ռիսկ պարունակու՞մ է, թե՞ ոչ: Անշուշտ պարունակում է, եթե նկատի ունենանք, որ վերջին երեք տարիներին պետական գնումների մեծ մասը կատարվել է առանց մրցույթի: Եթե սրա ընկալումը չկա, ապա բնական է, որ համաթիվը կբարելավվի, ինչի շնորհիվ էլ երկիրը կարող է ունենալ բարձր աստիճանակարգ:
Իսկ ինչ վերաբերում է «նախկինների» ժամանակին, ապա կոռուպցիայի ընկալման համաթվի վրա էական է եղել ներքաղաքական զարգացումների ազդեցությունը: Հանրային կարծիքի կամ ընկալման ձևավորման վրա էական ազդեցություն սկսեց գործել 2007 թվականին Համաժողովրդական շարժման առաջին կոնգրեսում Լևոն Տեր-Պետրոսյանի ելույթի հետևյալ հատվածը. «…Նկատի ունենալով, որ հասարակության համար ամենաանհանդուրժելի երևույթը կոռուպցիան է, ապա դրա դեմ պայքարը պետք է կարևորագույն տեղ զբաղեցնի մեր նախընտրական քարոզչության մեջ»։ Դրա արդյունքում, Հայաստանը 10 աստիճանով հետ գնաց, իսկ 2008 թվականի նախագահական ընտրություններից այնուհետև մարտիմեկյան իրադարձություններից հետո նկատվեց այդ միտման ուժեղացում, ինչի արդյուքնում Հայաստանը հայտնվեց 129-րդ հորիզոնականում: Այնուհետև սկսվեց որոշակի անկում տեղի ունենալ, իսկ 2013-2014 թվականներին կայունացավ 94-95 տեղերում: Ու, կրկին, ընդդիմադիր ուժերի բավական ագրեսիվ գործունեության ազդեցությամբ Հայաստանը նահանջեց՝ հասնելով 113-րդ հորիզոնական:
-Իր գրառման մեջ նախարար Քերոբյանը նկատել է, որ «լավ կառավարման արդյունքում` նախկինում տնտեսական աճն ապահովվում էր դղյակներ կառուցելով, իսկ այժմ` դպրոցներ ու մանկապարտեզներ»։
-Թույլ տվեք չմեկնաբանել այդ միտքը, քանի որ ամբողջովին քաղաքականությամբ է ներթափանցված: Բացի դրանից, «կառուցված դպրոցներն ու մանկապարտեզները» դժվար կլինի գտնել ու հաշվել: Իսկ ընդհանրապես «լավ կառավարում» բառակապակցությունը ոչ մի առնչություն չունի ոչ Քերոբյանի, ոչ էլ կոռուպցիայի համաթվի հետ: