Ռուսական Ведомости թերթը հաղորդում է, որ Մարդու իրավունքների նախագահական խորհրդում Դմիտրի Մեդվեդևը կխոսի ապաստալինիզացիայի մասին: Քննարկվելու են մի շարք հարցեր, սակայն խորհրդի ղեկավար Ֆեդոտովի հավաստմամբ, ապաստալինիզացիայի խնդիրը կլինի առաջնային:
Խորհուրդը նախնական այս թեման կքննարկի նոյմեբերի 30-ին: Իրավապաշտպաններն ասում են, որ ՌԴ նախագահն անմիջապես դրական է արձագանքել այս նախաձեռնությանը:
Թերթը նշում է, որ Մեդվեդևը մի քանի անգամ խոսել է Ստալինի ժամանակաշրջանի վերաբերյալ Քաղաքական բռնաճնշումների օրը` երիտասարդների հետ Վալդայի հանդիպմանը: Քարնեգի կենտրոնի ներկայացուցիչ Նիկոլայ Պետրովի կարծիքով, «սա, անկասկած, Կրեմլի գաղափարա-քարոզչական քայլ է, նպատակաուղղված շարժում` կոտրելու իմիջային խնդիրները Արևմուտքում»:
Պուտինն էլ է խոսել այս խնդրի վերաբերյալ, ըստ Պուտինի մամուլի խոսնակի՝ դա Պուտինի համար ավելի դժվար է, քանի որ վերջինս հատուկ ծառայություններից է, որոնք ժամանակին իրականացրել են այդ բռնաճնշումները:
Հունվարին նախատեսված նիստին «ապաստալինականացում» եզրույթը չի լինի, թեման ավելի լայն է` ազգային հաշտեցում և ամբողջատիրական ռեժիմների զոհերի հիշատակ, քանի որ խնդիր է դրված ամեն ինչ չնույնացնել անձի պաշտամունքի խնդրի հետ, այլ նպատակ ունենալ հաղթահարել անցյալի մնացուկները: Այս մասին ասել է խորհրդի անդամ Սերգեյ Կարագանովը:
«Մեմորիալ» կազմակերպությունը և Նախագահական խորհուրդը մշակել են չորս մասից բաղկացած ծրագիր` բոլոր արխիվային նյութերի հասանելիություն, անհայտ կորածների հայտնաբերում, բռնաճնշումներից տուժածներին օգնություն, ամբողջատիրական ժամանակաշրջանի իրադարձությունների համապատասխան քաղաքական գնահատում:
Իսկ այսօրինակ գործունեության պատճառ է դարձել որոշ ուժերի` այս տարվա Մայիսի 9-ի հաղթանակի տոնակատարությունների ժամանակ Ստալինի նկարների տեղադրման ցանկությունը, ինչպես նաև դասագրքերում Ստալինի դերակատարության վերաբերյալ նոր ձևակերպումները: Խորհրդում նախատեսում են, որ կարող են լինել նաև դատական գործեր ռեժիմի հանցագործությունները քննելիս:
Կառավարությունում նախագահական այս ձեռնարկը զգուշավորությամբ են մեկնաբանում. «Երկրի պատմությունը չի կարելի ջնջել: Մեր առաջնահերթություններից է պատմության խեղաթյուրումների դեմ պայքարելը»,-ասել է կառավարության խոսնակը:
