Ռազմագերիների և պահվող անձանց հարցը պահպանում է իր արդիականությունը, այդ թվում՝ Ռուսաստանի, Հայաստանի և Ադրբեջանի ղեկավարների 2020 թվականի հայտարարած դրույթների իրականացման համատեքստում։ Այս մասին հայտարարել է ՌԴ արտգործնախարարության պաշտոնական ներկայացուցիչ Մարիա Զախարովան ամենշաբաթյա ճեպազրույցի ընթացքում՝ պատասխանելով այն հարցին, թե ինչպես է Մոսկվան գնահատում հայ ռազմագերիների նկատմամբ Բաքվում անցկացվող անօրինական դատական գործընթացները։
«Մենք ողջունում ենք այս տարվա հունիսի 12-ին ադրբեջանական կողմից Երևանին Հայաստանի 15 քաղաքացիների վերադարձը։ Մենք կողմ ենք արտահայտվում այս խնդրի վերջնական լուծմանը «բոլորը բոլորի դիմաց» սկզբունքով՝ առանց որևէ նախապայմանի։ Ընդ որում, կարևոր ենք համարում նաև այլ հումանիտար խնդիրների լուծումը, մասնավորապես՝ ականազերծման և ականապատման քարտեզների տրամադրման առնչությամբ։
Այդ ուղղությամբ մեր գործադրած ջանքերի մասին, կարծում եմ, տեղյակ եք»,- ասել է Զախարովան։