COVID-19 նոր շտամը, որը ստացել է «Լյամբդա» անվանումը, հայտնաբերվել է 29 երկրներում, հիմնականում՝ Հարավային Ամերիկայում, որտեղ ենթադրաբար ծագել է: Այս մասին, «Սինհուայի» փոխանցմամբ, հայտնում է Առողջապահության համաշխարհային կազմակերպությունը (ԱՀԿ):
ԱՀԿ-ն նշել է, որ «Լյամբդա» շտամը, որն առաջին անգամ գրանցվել է Պերուում, հունիսի 14-ին ճանաչվել է որպես «հետաքրքրություն առաջացնող տարբերակ»՝ Հարավային Ամերիկայում «բարձր տարածվածության» պատճառով:
Ըստ Պերուի իշխանությունների տվյալների՝ «Լյամբդան» լայն տարածում է գտել այդ երկրում, և 2021 թվականի ապրիլից ի վեր բացահայտված COVID-19 դեպքերի 81% -ը հենց այդ շտամն է եղել:
Չիլիում այս շտամը կազմել է վերջին 60 օրվա ընթացքում հայտնաբերված բոլոր դեպքերի 32% -ը։ Տարածվածության առումով այն զիջում է միայն «Գամմա» շտամին, որն առաջին անգամ գրանցվել է Բրազիլիայում: Այլ երկրներ նույնպես հաղորդել են նոր շտամի տարածվածության աճի մասին, ներառյալ Արգենտինան և Էկվադորը:
«Լյամբդա» շտամը, ըստ ԱՀԿ-ի, պարունակում է մուտացիաներ, որոնք կարող են բարձրացնել վիրուսի վարակելիությունը կամ բարձրացնել դրա դիմադրողականությունը հակամարմինների նկատմամբ: Այնուամենայնիվ, նոր շտամի վերաբերյալ տվյալները դեռ բավարար չեն: «Լյամբդայի» տեսակն ավելի լավ հասկանալու համար անհրաժեշտ են ավելի շատ հետազոտություններ:
Ի տարբերություն «մտահոգություն առաջացնող տարբերակների», որոնք հաճախ լուսաբանվում են համաշխարհային լրատվամիջոցներով, «հետաքրքրություն առաջացնող տարբերակներին» հետևում են բժշկական կազմակերպությունները, բայց դեռ չեն դասակարգվել որպես տարբերակներ, որոնք էական վտանգ են ներկայացնում հանրային առողջության համար: