Նախընտրական իր հանդիպումներից մեկի ժամանակ Ռոբերտ Քոչարյանը հայտարարել է, թե մեծ վստահություն ունի Հադրութը վերադարձնելու հնարավորությունների մեջ, իսկ Շուշին վերադարձնելու գործում վստահ է կիսով չափ:
«Այդ հարցի լուծումն իրավական ճանապարհով նախկին ԼՂԻՄ-ի սահմանների շրջանակում հնարավոր է, և դրա համար կան համապատասխան փաստարկներ»,-ասել է Քոչարյանը՝ հավելելով, որ դա կարող է տևել երկու տարի:
Այս առնչությամբ «Հանուն Հադրութի» ՀԿ-ի գործադիր մարմնի նախագահ Լևոն Հայրյանը «Առաջին լրատվական»-ի հետ զրույցում Քոչարյանի հայտարարությունները նախընտրական հնարք համարեց. «368 կամ 369 տոկոսով նախընտրական հնարք է: Ընդհանրապես, եթե որևէ մեկն ուզում է խոսել Հադրութի մասին, թող իմանա, որ Հադրութի հարց գոյություն չունի այսօր, Ղարաբաղի հարց էլ գոյություն չունի, Հայաստանի հարցն է դրված օրակարգում: Եթե մի մարդ վախենում է դատապարտել նոյեմբերի 9-ի փաստաթուղթը, ես չեմ հավատում, որ նա ինչ-որ քայլեր պետք է անի Հադրութը հետ բերելու համար: Ժամանակին 1921 թվականին Ղարաբաղի քարտեզն այնպես է գծվել, որ այսօր ռուսները կարողանան երկու ժողովուրդների մեջ կռիվ սարքել: Լեռնային Ղարաբաղի այդ քարտեզը մեզ ապահովություն չէր տալիս, ինչպես կյանքը ցույց տվեց:
Ենթադրենք Հադրութը վերադարձրեցինք, հայության հարցը դրանով լուծվո՞ւմ է, չի լուծվում: Եթե մեկը խոսում է ԼՂԻՄ-ի տարածքը վերականգնելու մասին, ես նրան չեմ համարում մեր ժողովրդի բարեկամ: Իմ մոտեցումն այս է»,-ասաց նա:
Լևոն Հայրյանը նկատեց, որ Ռոբերտ Քոչարյանը հիմա նույնիսկ ԼՂԻՄ-ից չի խոսում, այլ միայն Հադրութից. «Որոշ ժամանակ առաջ Շուշիի մասին էլ էր խոսում, հիմա Շուշին հանել է, կամ խոսում է Շուշիի մասին մասամբ, կիսով չափ: Մեզ «կիսով չափ» ղեկավարներ պետք չեն: Մեկը մասամբ տալիս է Հայաստանը, մյուսն ասում է՝ մասամբ հետ կբերեմ: Ես վստահ եմ, որ ամբողջությամբ նախընտրական հայտարարություն է, նա ոչ մի ծրագիր էլ չունի: Լևոն Տեր-Պետրոսյանն աչքիս լույսը չի, բայց որ ասում է՝ Ռոբերտը Ղարաբաղն է դուրս թողել բանակցություններից, Նիկոլն էլ՝ Հայաստանը, իրականությանը շատ մոտ է: Ես չեմ կարծում, որ Ռուսաստանը շատ երկար ժամանակ թեկուզ իր սիրած Ռոբերտին կամ Սերժ Սարգսյանին, կամ Լևոն Տեր-Պետրոսյանին Ղարաբաղի հարցում լուրջ ուշադրություն դարձնի: Ինչպես Իգոր Մուրադյանն էր ասում, մեր հարցերով զբաղվելու են առանց մեզ: Երբ նայում ես մեր քաղաքական գործիչներին, միակ հույսը դա է մնում, որ մեր հարցերով զբաղվեն առանց մեզ»:
«Հանուն Հադրութի» ՀԿ-ի գործադիր մարմնի նախագահը վստահ է, որ եթե 1994 թվականի սահմանները չվերականգնվեն, և Արցախի անկախությունը չճանաչվի, ոչ միայն Հադրութը, Սյունիքը, Երևանը, հայ ազգը ամբողջությամբ հանգստություն չի ունենալու:
Հարցին, թե արդյոք հադրութցիները հույսեր են կապում Ռոբերտ Քոչարյանի հետ, նա պատասխանեց. «Հադրութցիները և մյուս ղարաբաղցիները հույս կապում են Քոչարյանի հետ, բայց ես համարում եմ, որ դա չհիմնավորված հույս է: Ոչ միայն Քոչարյանի, այլև մյուս բոլոր ուժերի հետ հույս կապելը սխալ է, որովհետև իրենք վախենում են սրտաբաց հայրենասիրությունից: Նրանց հայրենասիրությունը քվոտավորված է ռուսական իմպերիայի թույլտվության սահմաններում: Իսկ որևէ մեկը չի կասկածում, որ այսօր վերջին իրադարձությունները հիմնականում Ռուսաստանի ծրագրերն են Հայաստանի գլխին բերված»: