Ադրբեջանի նախագահ Իլհամ Ալիևն ասել է, որ առանց Ղարաբաղի ականապատ տարածքների` հայկական կողմի մոտ գտնվող քարտեզների տարածաշրջանի ականազերծման գործընթացը կարող է 10 տարի տևել: Նա այդ մասին հայտնել է Թուրքիայի նախագահ Ռեջեփ Թայիփ Էրդողանին՝ ավտոբուսներով համատեղ ուղևորության ժամանակ։
Թուրքիայի նախագահի կնոջ՝ Էմինե Էրդողանի հարցին` «Բանտարկյալներ (գերիներ – խմբ.) դեռ կա՞ն», Ալիևը պատասխանել է «Կան, կան»։
– Կամաց-կամաց, կամաց-կամաց։
– Աշխատում ենք։
Հայաստանը հունիսի 16-ին Աղդամի շրջանի 97 հազար ականների քարտեզներ է փոխանցել Ադրբեջանին։ Ալիևը պարզաբանել է, որ դրանցից 54 հազարը հակատանկային են, մնացածը՝ հակահետևակային։
Ընդ որում՝ Ադրբեջանի ղեկավարը վերացրել է, որ ԱՄՆ-ն երաշխավորվել է Հայաստանի փոխանցած քարտերի արժանահավատությունը:
Քաղաքագետ Անդրիաս Ղուկասյանի կարծիքով՝ քարտեզների դիմաց գերիների փոխանակման հարցը պետք է ավելի շուտ լուծվեր․ «Այն, որ վեց ամիս մեր հայրենակիցները որպես գերի գտնվում են Ադրբեջանում և իրենց այնտեղ դատում են՝ իշխանությունների մեծագույն սխալն է։ Փաստորեն կար այսպիսի հնարավորություն, ուստի այս փոխանակումը պետք է արվեր անմիջապես պատերազմից հետո։ Այն ականապատված դաշտերը մեզ գործնականում այսպիսի իրավիճակում ոչինչ չեն տալիս և մենք այս արհեստական խնդիրը ստեղծելով ոչ մի դրական արդյունքի չհասանք»,-«Առաջին լրատվական»-ի հետ զրույցում ասաց նա։
Ղուկասյանի խոսքերով՝եթե իշխանությունները գտնեն, որ այդ քարտեզները չպետք է տան, պետք է հիմնավորում բերեն, թե ինչու են դա անում ու ինչ ակնկալիք ունեն․«Հուսով են, որ ռազմական գործողություններ կսկվե՞ն»։
Դիտարկմանը, թե քննադատողներից շատերը դա համարում են արժեքավոր, քանի որ Բաքուն պետք է տասնյակ տարիներ ծախսեր դրանց ականազերծման համար, Ղուկասյանն արձագանքեց․ «Դա պետք է լիներ մեր գերիների հաշվի՞ն։ Մենք գտնում ենք, որ գերիներին ազատ արձակելու հարցն առաջնային է ու այդ քարտեզների փոխանակման գործողությունը պետք է խոչընդոտ չդառնար գերիներին ազատ արձակելու համար։ Բայց այն, որ դա ներկայացրեցին ընտրություններից առաջ՝ շատ վատ է բնութագրում իշխանություններին, որովհետև ստացվում է, որ իրենք այդ հարցն օգտագործեցին նեղ քաղաքական նպատակներով՝ անտեսելով մարդկանց անվտանգությունը, կյանքը, արժանապատվությունը, թողեցին, որ այսքան ժամանակ զինվորները գտնվեն Ադրբեջանում»,-եզրափակեց նա։
