«Առաջին լրատվական»-ի հարցերին պատասխանել է Արցախի ԱԺ փոխնախագահ, «Միասնական Հայրենիք» խմբակցության ղեկավար Գագիկ Բաղունցը
Ինչպե՞ս եք գնահատում Հայաստանում ընթացող քաղաքական զարգացումները, մասնավորապես այն, որ Արցախից տարբեր ուժերի ներկայացուցիչներ եկել և ներգրավվել են նախընտրական պայքարում, սատարում են Ռոբերտ Քոչարյանին: Արցախի ներգրավվածությունը այս ընտրություններում մտահոգի՞չ է, թե ոչ:
Բնականաբար, շատ ուշադիր հետևում ենք, կարևորում ենք ընտրությունների արդյունքները, քանզի դրա հետ կապված և Արցախի ճակատագիրն է որոշվում, և ինչու չէ, նաև Հայաստանի: Այս պահի դրությամբ բավականին անորոշ է իրավիճակը: Իմ կարծիքով չի կարելի այս պահին ասել, թե ով է մեծ հավանականությամբ հաղթելու ընտրություններում: Կան հստակ առաջնորդները այս մրցապայքարի, կան այսպես կոչված, աուդսայդերները, որոնք բնականաբար, ընտրական շեմը չեն անցնելու: Ինչ վերաբերում է Արցախից ներկայացված ներկայացուցիչներին, որոնք այս կամ այն ուժին սատարում են, ամեն ինչ պետք է լինի օրենքի շրջանակներում: Կարելի է հետաքրքրվել, աջակցել, բայց ոչ անմիջապես մասնակցություն ունենալ օրենքի խախտումով: Մենք՝ «Միասնական հայրենիք» կուսակցության անդամներս և մի մեծ զանգված արցախցիներ, Սամվել Բաբայանի աջակիցները, իհարկե, Ազատական կուսակցությանը հաջողություն ենք ցանկանում: Կարծում ենք, որ այսօրվա բարդ իրավիճակում մենք ակնհայտորեն պետք է ունենաք հզոր, ուժեղ բանակ, իսկ միակ մարդը, որ ի վիճակի է այսօրվա կազմալուծված խուճապի մեջ ընկած բանակը խելքի բերել, Սամվել Բաբայանն է: Մեր բանակի կազմալուծված վիճակից դուրս հանելու գործընթացը միայն ու միայն հնարավոր է Սամվել Բաբայանի ղեկավարությամբ:
Կոնկրետ անուններ կա՞ն, թե ովքեր են այդտեղից փորձում միջամտել Հայաստանի նախընտրական քաղաքական զարգացումներին:
Կարծում եմ՝ անհրաժեշտություն չկա, որ ես մատնանշեմ, դուք ինքներդ տեսնում եք բոլոր հանդիպումներին որոշ ուժերի առաջնորդների կողքը կանգնած են մեր գործընկեր պատգամավորները, այսպես կոչված, ընդդիմադիր ուժերից:
Ճի՞շտ եք համարում, որ գալիս են ու փորձում ընտրություններին խառնվել:
Ես արդեն ասացի, որ դա թե Արցախում, թե Հայաստանում օրենքով չի նախատեսվում, որ այդ երկրի քաղաքացիները գան և քարոզարշավին ակտիվ մասնակցություն ունենան: Խորհրդակցել, մտահոգվել կարող են, բայց անմիջապես մասնակցել քարոզարշավի շրջանակներում հանդիպումներին, ելույթներ ունենալ, ակտիվ քարոզչությամբ զբաղվել, դա թե Արցախի, թե Հայաստանի ընտրական օրենսգրքերով արգելված է:
Ռոբերտ Քոչարյանը իր հանդիպումների ժամանակ խոստանում է Հադրութը վերադարձնել, Շուշին վերադարձնել: Սրանք պոպուլիստական հայտարարություննե՞ր են, թե՞ այդպիսի հավանականություն տեսնում եք:
Պարոն Քոչարյանը որպես արմատներով ղարաբաղցի, որպես հայ, մեր բոլորի նման այդպիսի ցանկություններ ունի: Եթե ինքը հնարավոր է դա տեսնում, երևի ՀՀ քարոզարշավին հետևող ցանկացած մարդ կարող է հարց տալ, թե ոնց եք դա տեսնում: Ես միշտ էլ կողմնակից եմ եղել, որ քարոզարշավների ժամանակ հնչեցրած ցանկացած միտք, գաղափար, ծրագիր պետք է հիմնավորված լինի, հաշվարկված լինի: Տա Աստված, որ նման ծրագրերը իրական հիմք ունենան:
