Երեքշաբթի գիշերը Պիցունդայում կրակոցների հետևանքով վիրավորվել է երկու ռուսաստանցի, կրակող քաղաքացուն հսկողության տակ են վերցրել: Այս մասին հայտնում է Աբխազիայի ՆԳՆ մամուլի ծառայությունը:
Դեպքը տեղի է ունեցել «Ապսնի» ռեստորանում, որը գտնվում է «Սամշիտովայա Ռոշչա» հանգստյան տան տարածքում:
Աբխազիայի ՆԳՆ մամուլի ծառայության փոխանցմամբ՝ կրակողը հանրապետության քաղաքացի է, Գուդաուտայի շրջանի Լիխնի գյուղի բնակիչ, 1978 թվականին ծնված Դմիտրի Վիկտորի Պիլիան է: Ռուսաստանցիների հետ վիճաբանության հետևանքով նա նրանցից մեկի երկու ոտքերին երեք հրազենային վնասվածք է հասցրել, երկրորդի ձախ ոտքին և կոնքին՝ 6 հրազենային վիրավորում։
Ռուսաստանի Դաշնության քաղաքացիներ Փիլոյանը և Սալիմգարիևը տեղափոխվել են Գագրա քաղաքի կենտրոնական մարզային հիվանդանոց, առաջնային բուժօգնություն ցուցաբերելուց հետո տեղափոխվել են Ռուսաստանի բժշկական հաստատություններ։
Բացի դրանից՝ արձակված փամփուշտների բեկորներից վիրավորվել է նաև կրակողը: Այժմ նա բերման է ենթարկվել և գտնվում է Սուխում քաղաքի կենտրոնական մարզային հիվանդանոցում:
Ըստ ՆԳՆ-ի՝ ավելի վաղ Պիլիան բազմիցս ներգրավված է եղել տարբեր իրավախախտումների մեջ: Նշվում է, որ մայիսի 17-ին նրա դեմ քրեական գործ է հարուցվել ապօրինի կերպով հրազեն ձեռք բերելու, պահելու և կրելու փաստի առթիվ, իսկ մայիսի 18-ին նրա նկատմամբ ընտրվել է խափանման միջոց՝ չհեռանալու մասին ստորագրություն: Հունիսի 4-ին նախաքննությունն ավարտվել էր, Սուխում քաղաքի դատախազի կողմից մեղադրական եզրակացությունը հաստատելուց հետո քրեական գործն ուղարկվել էր դատարան՝ դրա հիմնավորումները դիտարկելու և դատավճիռ կայացնելու համար:
Հանրապետությունում Ռուսաստանի դեսպանության մամուլի քարտուղար Դենիս Լավրիկովի խոսքերով՝ երկու վիրավոր տղամարդկանց կյանքին վտանգ չի սպառնում: Նրանց տեղափոխել են Սոչի՝ հետագա բուժման նպատակով:
