Նովոսիբիրսկում գազալցակայանի երեկվա պայթյունից տուժածների թիվը հասել է 35-ի։ Այդ թիվը կարող է աճել։ Այս մասին հայտնում է TASS-ը՝ հղում անելով արտակարգ ծառայություններին։ Տուժածներից 20-ն այրվածքներով հոսպիտալացվել են։ Եվս 15-ին ամբուլատոր օգնություն է ցուցաբերվել։ Բժիշկները տուժածներից ավելի քան 10-ի վիճակը գնահատում են ծանր։ Ավելի վաղ հայտնել էինք 26 վիրավորի մասին։
Հրդեհը, որը բռնկվել է պայթյունից հետո, հրշեջները մարել են մոտ 3 ժամ։ Այն տարածվել է 1․5 հազար քմ տարածքում։ Անվտանգության տեխնիկայի խախտման հոդվածով քրեական գործ է հարուցվել։ Միջադեպի պատճառ է դարձել գազի արտահոսքն ու գազային տարայի ապահերմետիկացումը։
