Կորոնավիրուսի նոր շտամներով վարակվելու դեպքում երիտասարդներն ավելի թեթև են տանում հիվանդությունը, սակայն նրանք միևնույն ժամանակ COVID-19-ի հիմնական փոխանցողներն են։ РИА Новости գործակալության փոխանցմամբ՝ այս մասին հայտնել է Ռոսպոտրեբնադզորի համաճարակաբանության կենտրոնական գիտահետազոտական ինստիտուտի կլինիկական և վերլուծական աշխատանքների գծով փոխտնօրիեն Նատալյա Պշենիչնայան։
Գործակալության զրուցակիցը պարզաբանել է, որ այդ դեպքում ախտանիշները, որպես կանոն, նման են սեզոնային սուր շնչառական վիրուսային ինֆեկցիայի ախտանիշների, ուստի վիրուսակիրները դրանց լուրջ չեն վերաբերվում և շարունակում են վարել իրենց սովորական առօրյան:
«Երիտասարդները վարակի հիմնական աղբյուրն են։ Նրանք ակտիվորեն տարածում են COVID-19-ը՝ չգիտակցելով իրենց թեթևամիտ վարքի հետևանքները»,- ասել է մասնագետը:
Ավելի վաղ փորձագետը РИА Новости-ին հայտնել էր, որ կորոնավիրուսի հիմնական ախտանիշների փոփոխությունները բացատրվում են դրա մուտացիաներով: Եվ այսպես, կորոնավիրուսի հնդկական շտամին ավելի շատ բնորոշ են աղեստամոքսային տրակտի կողմից դրսևորումներ՝ որովայնի ցավ, ախորժակի կորուստ, փսխում, սրտխառնոց, ինչպես նաև հոդացավեր, լսողության կորուստ:
Կոկորդի ցավերն ավելի բնորոշ են ադենովիրուսային վարակի և COVID-19-ի համադրությանը: Բացի այդ, ծաղկափոշուց սեզոնային ալերգիան կարող է անդրադառնալ հիվանդության կլինիկական պատկերի վրա:
