Մեծ Բրիտանիայի վարչապետ Բորիս Ջոնսոնը կարող է չորս շաբաթով հետաձգել կորոնավիրուսային սահմանափակումների չեղարկումը, որը նախատեսված էր հունիսի 21-ին։ BBC-ի փոխանցմամբ՝ դա պետք է թույլ տա, որ ավելի մեծ թվով մարդիկ պատվաստվեն և ստանան կորոնավիրուսի դեմ պատվաստանյութի երկրորդ դեղաչափերը։ Բանն այն է, որ Բրիտանիայում աճում են Covid-19-ի «Դելտա» շտամի դեպքերը։
Worldometers կայքի տվյալներով՝ Բրիտանիայում մինչև օրս հաստատվել է կորոնավիրուսի 4,5 միլիոն դեպք, որոնցից 127 հազարը՝ մահվան ելքով։
Իսկ ընդհանուր առմամբ՝ աշխարհում հաստատված կորոնավիրուսի դեպքերի թիվը մոտենում է 177 միլիոնի։ Վիրուսը 3 միլիոն 800 հազար մարդու կյանք է խլել։
Աշխարհում կորոնավիրուսի դեմ պատվաստանյութ է ստացել 2 միլիարդ 226 միլիոն մարդ, ամբողջությամբ պատվաստված է, այսինքն՝ պատվաստանյութի 2 դեղաչափ է ստացել 480 միլիոն մարդ։
