Այսօր կայացած Լիտվա-Հայաստան ընկերական հանդիպումը ֆուտբոլի հայ երկրպագուներին դժվար թե երբևէ լավագույն հիշողություններ պարգևի: Մեր թիմը, չնայած ողջ հանդիպման ընթացքում ունեցած տարածքային և խաղային առավելությանը, պարտվեց խոշոր` 3-0 հաշվով:
Կաունասում տեղի ունեցած խաղում հաշիվը շատ արագ անկյունայինի իրացումից հետո բացեց Կլիմավիչուսը: Գոլից հետո նախաձեռնությունը գրեթե ամբողջությամբ անցավ մեր տղաներին, որոնք գործում էին առանց մի քանի առաջատարների` դաշտում չէին Արզումանյանը, Բերեզովսկին, Մովսիսյանը և Մանուչարյանը:
Վերջին երկուսը խաղադաշտ մտան արդեն երկրորդ խաղակեսում և զգալիորեն ակտիվացրին Վարդան Մինասյանի ղեկավարած թիմի խաղն առջևի գծում: Թվում էր` հաշիվը շուտով անպայման հավասարվելու է, սակայն թիմի նորեկ, պաշտպան Վարազդատ Հարոյանը 59-րդ րոպեին երկրորդ դեղին քարտն ստացավ և հեռացվեց խաղադաշտից, ինչից էլ շատ չանցած շտապեցին օգտվել տանտերերը:
Նախ 74-րդ րոպեին տուգանայինից մեր երիտասարդ ու անփորձ դարպասապահ Իսրայելյանի դարպասը գրավեց Չեսնաուսկիսը, ապա երեք րոպե անց լիտվացիների կոմբինացիոն գրոհը եզրափակեց Բենիուսիսը:
Ավելացնենք միայն, որ այս խաղում բացի վերը նշված երկու ֆուտբոլիստներից իրենց նորամուտը Հայաստանի ազգային հավաքականում նշեցին ևս երկու ֆուտբոլիստներ` Զադոյանը և Սարկիսովը:
