Միացյալ Նահանգների նախագահ Ջո Բայդենը համաձայն է Ռուսաստանի նախագահ Վլադիմիր Պուտինի հետ ռուս-ամերիկյան հարաբերությունների գնահատման հարցում: Նա իր կարծիքը հայտնել է մամուլի ասուլիսի ժամանակ:
«Կարծում եմ, որ նա (Պուտինը) ճիշտ է այն հարցում, որ ԱՄՆ-ՌԴ հարաբերություններն ամենացածր մակարդակի են», – ասել է Բայդենը: Միաժամանակ, հավաստիացրել է, որ Վաշինգտոնը հակամարտություն չի փնտրում Մոսկվայի հետ: Ամերիկացի առաջնորդի խոսքով՝ Ռուսաստանը և ԱՄՆ-ն կարող են համագործակցել ռազմավարական կայունության և այլ ոլորտներում:
Ավելի վաղ ՌԴ ղեկավարն ամերիկյան NBC հեռուստաալիքին տված հարցազրույցում ասել էր, որ Մոսկվայի և Վաշինգտոնի երկկողմ հարաբերությունները գտնվւմ են «վերջին տարիների ամենացածր կետում»:
Հունիսի 16-ին ժնևում նախատեսվում է Պուտին-Բայդեն հանդիպում: Ըստ Ռուսաստանի առաջնորդի մամուլի քարտուղար Դմիտրի Պեսկովի, Պուտինը գագաթնաժողովին կգա «ոչ թե նույն հարթակում հայտնվելու համար, այլ՝ Ռուսաստանի Դաշնության և ԱՄՆ-ի վատ հարաբերությունների պատճառով»:
ԱՄՆ Սպիտակ տան մամուլի ծառայության ղեկավար Ջեն Փսակին իր հերթին ասել է, որ ԱՄՆ-ը ցանկանում է գագաթնաժողովում գտնել Ռուսաստանի հետ հարաբերություններում «առաջտնթաց ուղի»: Միևնույն ժամանակ, նա նշել է, որ Վաշինգտոնը իրեն իրավունք է վերապահում պատժամիջոցներ կիրառել Ռուսաստանի դեմ՝ նույնիսկ առաջիկա հանդիպման ֆոնին: