Ռուսաստանի նախագահ Վլադիմիր Պուտինն ասել է, որ կիբերանվտանգության խնդիրը ժամանակակից աշխարհում ամենակարևորներից մեկն է, քանի որ հաքերները կարող են անջատել ամբողջ համակարգերը, ինչը սպառնում է ծանր հետևանքներով: Այս մասին նա ասել է Россия-1 հեռուստաընկերության Москва. Кремль. Путин հաղորդմանը տված հարցազրույցում, որի մի հատվածը հրապարակվել է Смотрим կայքում:
«Կիբերանվտանգության խնդիրն այսօր ամենակարևորներից մեկն է, քանի որ ամբողջ համակարգերի ցանկացած անջատում շատ ծանր հետևանքների է հանգեցնում, և դա պարզվում է՝ հնարավոր է», – բացատրել է Ռուսաստանի ղեկավարը:
Պուտինը նաև շեշտել է, որ Ռուսաստանը պատրաստ կլինի արտահանձնել կիբերհանցագործներին ԱՄՆ, եթե ամերիկյան կողմը ևս նման հանցագործներին արտահանձնի Ռուսաստանի Դաշնությանը:
Ինչպես հայտնել ենք, Պուտինը խոսել է Բայդենի հետ հանդիպումից ունեցած ակնկալիքների մասին։
Ռուսաստանի նախագահն իր ամերիկացի գործընկերոջ հետ հանդիպումից առաջ ասել է, որ Ռուսաստանն ու ԱՄՆ-ն ունեն երկուստեք հետաքրքրություն ներկայացնող հարցեր։