Մոսկվան և Վաշինգտոնը փորձում են նվազեցնել բացասական հռետորաբանությունը, բայց պետք չէ ինքներս մեզ խաբենք: Հունիսի 13-ին այս հայտարարությունն է արել ՌԴ նախագահ Վլադիմիր Պուտինը՝ խոսելով ամերիկացի իր գործընկեր Ջո Բայդենի հետ հանդիպումից ունեցած ակնկալիքների մասին:
«Բարձր մակարդակի հանդիպումների նախօրեին երկու կողմերն էլ միշտ փորձում են նվազեցնել ցանկացած բացասական հռետորաբանություն՝ աշխատանքի համար համապատասխան բարենպաստ միջավայր ստեղծելու նպատակով: Այստեղ առանձնահատուկ բան չկա. ես ինձ չէի խաբի», – ասել է Ռուսաստանի առաջնորդը Россия 1 հեռուստաընկերության Москва.Кремль.Путин հաղորդաշարի հաղորդավար Պավել Զարուբինին:
Ըստ պետության ղեկավարի՝ դա պրոֆեսիոնալ մոտեցում է, և Ռուսաստանը նույն կերպ է վարվում:
Ինչպես նշել է Պուտինը, Ռուսաստանի և ԱՄՆ-ի տնտեսությունները երկկողմ հետաքրքրվածություն ունեն: «Ամերիկյան շատ ընկերություններ ցանկանում են աշխատել մեզ հետ: Նրանց «ականջներից ձգելով» հանում են մեր շուկայից, նրանք տեղը զիջում են մրցակիցներին: Սա իրո՞ք օգտակար է ամերիկյան տնտեսության համար»,-հարցրել է Պուտինը։
Եթե հանդիպման արդյունքում ստեղծվեն աշխատանքի մեխանիզմներ, լավ կլինի, շեշտել է նա:
Ռուսաստանի և Միացյալ Նահանգների գագաթնաժողովի նպատակը, Պուտինի համոզմամբ, անձնական շփումների, հարաբերությունների վերականգնումն է, երկխոսության հաստատումը և համագործակցության ստեղծումը փոխադարձ հետաքրքրություն ներկայացնող ոլորտներում: Նա նկատել է, որ Վաշինգտոնում նույն բանի մասին են խոսում:
Հիշեցնենք, որ Ռուսաստանի և Միացյալ Նահանգների նախագահների հանդիպումը տեղի կունենա հունիսի 16-ին Ժնևում: