Նամախվանի ՀԷԿ-ի «Էնկա» շինարարական ընկերությունը հայտարարում է, որ լուրերն այն մասին, որ ընկերությունը հավաքել է տեխնիկան և դադարեցրել աշխատանքը, իրականությանը չի համապատասխանում: Հայտնում է 1tv.ge-ն։
«Սոցիալական ցանցերում տեղեկատվություն է տարածվում, իբր «Էնկա» ընկերությունը տեխնիկան հավաքել ու դադարեցրել է իր աշխատանքը, դա չի համապատասխանում իրականությանը:
Ընկերությունը չի պատրաստվում դադարեցնել երկրի համար կարևոր նախագիծը՝ «Նամախվանի ՀԷԿ»-ը, հրաժարվել ներդրումային պարտավորություններից և լքել երկիրը:
Ընկերությունը նաև պատրաստ է նախագծի վերաբերյալ անհրաժեշտ տեղեկատվություն տրամադրել գործընթացի բոլոր շահագրգիռ կողմերին»,-ասված է հայտարարության մեջ:
Հիշեցնենք, Վրաստանում թուրքական ընկերության կողմից «Նամախվանի ՀԷԿ» կասկադի կառուցման նախագծի դեմ տևական ժամանակ է բողոքի ակցիաներ են ընթանում։
Օրեր առաջ Վրաստանի վարչապետ Իրակլի Ղարիբաշվիլին Քութայիսում լրագրողների հետ զրույցի ընթացքում արձագանքել է «Նամախվանի» ՀԷԿ-ի շինարարության հարցին և հայտնել , որ ինքը ծանոթացել է ՀԷԿ-ի շինարարության նախագծին ու ներդրողների հետ միասին աշխատում են, որ առկա նախագծով չկառուցվի։
2019 թվականին Վրաստանի կառավարությունը «Նամախվանի ՀԷԿ» կասկադը զարգացնելու, կառուցելու և շահագործելու իրավունք շնորհեց թուրքական ENKA և նորվեգական Clean Energy Group ընկերություններին: Երկու հէկերի կասկադը միացնելու է Ռիոնի գետի երկու հիդրոէլեկտրակայանները`433 ՄՎտ հզորությամբ: Շինարարության ավարտից հետո Վրաստանում էլեկտրաէներգիայի արտադրությունը կավելանա 15%-ով: Կասկադի կառուցման համար ներդրվել է 750 միլիոն դոլար: Գումարային փոխհատուցում է տրամադրվել տարածաշրջանի բնակչությանը:
Տարածքի շահագործումը թուրքական կողմին է հանձնվել 99 տարի ժամկետով: ENKA ընկերության ներկայացուցիչները հավաստիացնում են, որ նախագիծը միանգամայն անվտանգ է շրջակա միջավայրի համար, և խոստանում են «Նամախվանի» ՀԷԿ-ում աշխատանքի տեղավորել 1,6 հազար տեղի բնակչի:
