Արտահերթ խորհրդարանական ընտրությունների քարոզարշավի 6-րդ օրը քաղաքական ուժերը կշարունակեն արշավներ իրականացնել անցնելով ՀՀ բոլոր մարզերի քաղաքներով և գյուղերով:
Ընտրություններին մասնակցում է 25 քաղաքական ուժ՝ 21 կուսակցություն և 4 դաշինք: Ընտրություններն անցկացվելու են հունիսի 20-ին:
«Նախընտրական քրոնիկոն» ծրագիրը:
«Ինքնիշխան Հայաստան» կուսակցությունը քարոզարշավն իրականացնելու է Արագածոտնի մարզում, ինչպես նաև մայրաքաղաքում։ Այցելելու են Աշտարակ քաղաք, այնուհետև կվերադառնան Երևան՝ Աջափնյակ վարչական շրջան։
«5165 ազգային պահպանողական շարժում» կուսակցությունը հունիսի 12-ին լինելու է Արագածոտնի մարզում։ Ժամը 13։00-ին անդամները կլինեն Աշտարակի Ներսես Աշտարակեցու հրապարակում, իսկ 18։00-ին՝ Ապարանի հրապարակում։
«Քաղաքացիական պայմանագիր» կուսակցությունը քարոզարշավն իրականացնելու է Գեղարքունիքի մարզում։ Քաղաքացիների հետ հանդիպումները սկսվելու են ժամը 10։30-ից՝ Սևան քաղաքից։ Կուսակցության անդամները կայցելեն նաև Ծովագյուղ, Ճամբարակ, Շորժա, Վարդենիս, Վարդենիկ, Մարտունի, Ներքին Գետաշեն, Նորատուս, Սարուխան, Կարմիրգյուղ համայնքները։ Արշավները կամփոփեն ժամը 19։30-ին՝ Գավառ քաղաքի հրապարակում։
«Լուսավոր Հայաստան» կուսակցության ներկայացուցիչները քաղաքացիների հետ հանդիպումներ կունենան Երևանում: Ժամը 11:30-ին նրանք կլինեն Գևորգ Չաուշի արձանի մոտ: Լրագրողների հետ նույնպես հավաք կլինի՝ ժամը 16:00-ին՝ Դավթաշեն վարչական շրջանում’ Դավթաշենի այգու սկզբնամասում:
Կուսակցության մյուս խումբը կլինի Շիրակի մարզում՝ Մարալիկում, Արթիկում ու Գյումրիում:
«Ազատ հայրենիք» դաշինքը հունիսի 12-ին լինելու է Գեղարքունիքի մարզում։ Ժամը 12։00-ին նրանք կլինեն Գավառում, ապա 14։00-ին՝ Մարտունիում, 15։00-ին՝ Վարդենիսում։ Ժամը 20։00-ին դաշինքի ներկայացուցիչները Երևանի Ավան վարչական շրջանում հանդես կգան մամուլի ասուլիսով։
«Հայաստան» դաշինքը՝ ՀՀ երկրորդ նախագահ Ռոբերտ Քոչարյանի գլխավորությամբ և մյուս առաջնորդների մասնակցությամբ լինելու է Լոռու մարզում։ Նրանք լինելու են Սպիտակում, Ստեփանավանում, Տաշիրում, Վանաձորում, Ալավերդիում։
«Բարգավաճ Հայաստան» կուսակցությունը քարոզարշավի 5-րդ օրը կլինի Արարատի մարզում։ Հանդիպումները կմեկնարկեն ժամը 19։00-ին, սկզբում կլինեն Արտաշատում, ապա 20։00-ին՝ Արարատում։
«Հայ ազգային կոնգրես» կուսակցության ներկայացուցիչները կլինեն Շիրակի մարզում, կհանդիպեն ընտրողների հետ, կներկայացնեն կուսակցության ծրագիրն ու ապագայի մասին իրենց տեսլականը: Ժամը 11։30-ին նրանք կլինեն Մարալիկում, 13:00-ին՝ Գյումրիում:
«Զարթոնք» ազգային քրիստոնեական կուսակցության թեկնածուները հունիսի 12-ին, առավոտյան ժամը 07:00-ին, Արաբկիր վարչական շրջանում գտնվող գրասենյակից ուղևորվել են արտահերթ խորհրդարանական ընտրությունների 6-րդ օրվա քարոզարշավը Շիրակի մարզում անցկացնելու։ Այցելություններ կլինեն խոշոր գյուղեր, ինչպես նաև Գյումրի քաղաք։
«Մեր տունը Հայաստանն է» կուսակցությունը քարոզարշավը կմեկնարկի ժամը 12։00-ին Անի պլազա հյուրանոցի մեծ դահլիճում։ Նախընտրական քարոզարշավի շրջանակներում կուսակցության անդամները հանդիպելու են համախոհների և վստահված անձանց համապետական շտաբի ներկայացուցիչների հետ։ Ներկայացվելու են քվեարկության և հաշվարկի վերահսկողության գործընթացի մանրամասներ։
Քարոզարշավը կտևի մինչև հունիսի 18-ը ժամը 24:00-ն: Էլեկտրոնային եղանակով քվեարկությունը մեկնարկել է հունիսի 11-ին ժամը 08:00-ին և կտևի մինչև հունիսի 13-ը ժամը 20:00-ն: Թեկնածուները, կուսակցությունները, կուսակցությունների դաշինքները կամ դաշինքի անդամ կուսակցություններն ինքնաբացարկի մասին դիմում կարող են ներկայացնել մինչև հունիսի 10-ը ժամը 18:00-ն:
Ընտրողներն ընտրատեղամասում ստանալու են մասնակցող քաղաքական ուժերի թվին համապատասխան քվեաթերթիկներ, ընտրելու են դրանցից միայն մեկը, դնելու են ծրարի մեջ ու գցելու քվեատուփը: Ընտրողները քվեաթերթիկի վրա գրիչով որևէ նշում չեն կատարելու:
