Մեծ Յոթնյակի առաջնորդները կստորագրեն հռչակագիր՝ Առողջապահության համաշխարհային կազմակերպության բարեփոխման միջոցով COVID-19 համավարակի կրկնությունից խուսափելու համար։ Համավարակներից խուսափել հնարավոր կլինի նաև պատվաստանյութերի ստեղծման ժամկետների կրճատման, ինչպես նաև բուժման և ախտորոշման արդյունավետ մեթոդների մշակման միջոցով։ Այս մասին հայտնում է The National News-ը։
Փաստաթուղթը կկրի անգլիական քաղաքի անունը, որտեղ անցկացվում է G7-ի առաջնորդների հանդիպումը։ Այն կկոչվի Կարբիս-Բեյի հռչակագիր։
«Յոթնյակի խումբը՝ Ավստրալիայի, Հարավային Կորեայի և Հարավային Աֆրիկայի առաջնորդների, ինչպես նաև ՄԱԿ-ի գլխավոր քարտուղար ԱՆտոնիո Գուտերեշի հետ պարտավորվել են ապահովել աշխարհի պաշտպանությունը կորոնավիրուսի հետագա սպառալիքներից»,-ասված է հրապարակման մեջ։
Հռչակագրում խորհուրդներ կան այն մասին, թե ինչպես կառավարություններն ու միջազգային կազմակերպությունները կարող են արագ արձագանքել նոր բռնկումներին։ Հռչակագրին աջակցություն է հայտնել նաև ԱՀԿ գլխավոր տնօրեն Թեդրոս Գեբրեյեսուսը։ Հռչակագրի ամբողջական տեքստը կհրապարակվի գագաթնաժողովի եզրափակիչ օրը՝ հունիսի 13-ին՝ ամփոփիչ կոմյունիկեի հետ։
Ավելի վաղ հաղորդվել էր, որ Յոթնյակի երկրները մտադիր են ֆինանսական օգնություն հատկացնել երկրներին, որոնք առավել մեծ դժվարությունների են բախվել COVID-19-ի դեմ պայքարում։ Նրանց կարիքների համար Արժույթի միջազգային հիմնադրամից ծրագրվում է հատկացնել 100 մլրդ դոլար։ G7-ը աշխարհի երկրներին կհատկացնի նաև 1 մլրդ դեղաչափ քովիդ-պատվաստանյութ, որից 500 մլն դեղաչափը կտրամադրի ԱՄՆ-ը։