Հնդկաստանում «սև բորբոսով» դեպքերի քանակը երեք շաբաթում ավելացել է 150%-ով և հասել 31 216-ի, ավելի քան երկու հազար մարդ մահացել է, հայտնում է NDTV հեռուստաալիքը՝ հղում կատարելով բժշկական աղբյուրներին:
Ըստ առկա տվյալների՝ այդ հիվանդությունից ամենաշատը տուժել է Մահարաշտրա նահանգը, գրանցվել է հիվանդության 7 057 դեպք, մահացել է ավելի քան 600 մարդ: Առաջին եռյակում է նաև Գուջարաթ նահանգը, որտեղ դեպքերի թիվը գերազանցել է 5 հազարը, կա ավելի քան 300 մահվան դեպք: Երրորդ տուժած նահանգը Ռաջաստանն է, որտեղ վարակվածների թիվը հասել է գրեթե 3 հազարի, մահացել է 188 հիվանդ:
Նշվում է, որ հիվանդության արագ տարածման պատճառը «Amphotericin-B» (հակասնկային միջոց) դեղամիջոցի սուր դեֆիցիտն է, որն անհրաժեշտ է «սև բորբոսով» վարակվածներին բուժելու համար, ինչպես նաև հնդկական առողջապահական համակարգի ընդհանուր գերբեռնվածությունը:
