Վերջերս Մեծ Բրիտանիայում COVID-19-ով վարակված մարդկանց մեծ մասի մոտ ախտորոշվում է կորոնավիրուսի հնդկական շտամ, որը հայտնի է «Դելտա» անունով: Ինչպես նշում է The Telegraph-ը, վկայակոչելով Մեծ Բրիտանիայի առողջապահության նախարար Մեթ Հենքոկին, նոր տեսակի կորոնավիրուսով վարակվածների թիվը հասել է 91 տոկոսի:
Հիվանդացության ցուցանիշը կտրուկ աճել է երկրում, հատկապես՝ հյուսիս-արևմուտքում: Միևնույն ժամանակ, հոսպիտալացումների թիվը ցածր է: Ավելի վաղ Հենքոկը մտավախություն էր հայտնել, որ կորոնավիրուսի հնդկական շտամը կարող է ազդել Մեծ Բրիտանիայում սահմանափակումների վերացման տեմպի վրա:
Նա նշել է, որ բրիտանացի փորձագետները կաշխատեն ամերիկացի գործընկերների հետ՝ վիրուսի դեմ պայքարի ջանքերն ակտիվացնելու ուղղությամբ:
Ավելի վաղ ԱՀԿ-ն կանխատեսել էր Եվրոպայում կորոնավիրուսի ավելի վարակիչ շտամի տարածումը: Հաղորդվել էր առնվազն 53 երկրում B.1.617 շտամի տարածման մասին: Ենթադրվում է, որ «Դելտան» 40-60 տոկոսով ավելի վարակիչ է կորոնավիրուսի դասական տարբերակից:
