Գերմանիայի ԱԳ նախարար Հայկո Մաասը Մեծ յոթնյակի գագաթնաժողովի նախօրեին համախմբվածության կոչ է արել Արևմուտքի տնտեսապես զարգացած երկրներին, հայտնում են գերմանական ԶԼՄ-ները։
«Եթե մենք համարձակորեն օգտվենք ժամանակի թելադրանքից՝ կգործենք միահամուռ՝ ապացուցելով մեր բաց տնտեսական և սոցիալական մոդելի կայությունը, այդ թվում Մոսկվայի ու Պեկինի նկատմամբ»,-ասել է նա։ Նրա կարծիքով՝ դրան հասնելու հնարավորությունը կախված է եվրոպացիներից։ նա նշել է, որ միայն ներքին քաղաքականությունում համերաշխ, իսկ արտաքին քաղաքականությունում գործունակ Եվրոպան կարող է անհրաժեշտ կշիռ ստանալ գլոբալ մասշտաբով։
Գերմանիայի ԱԳ նախարարը Յոթնյակի խմբի ներկայիս գագաթնաժողովն անվանել է «G7-ի նոր սկիզբ»։
«ԱՄՆ-ը վերադարձել է միջազգային հարթակ։ Մենք՝ եվրոպացիներս, ասում ենք Ձեզ «Welcome back»»,-ասել է նա։
Մաասը հավելել է, որ G7-ը պետք է քննարկի քովիդ-պատվաստանյութերի արդար բաշխումը, կայուն զարգացումը, ինչպես նաև գլոբալ տաքացման դեմ պայքարին վերաբերող հարցեր։
G7-ի գագաթնաժողովը կանցկացվի հունիսի 11-13-ը, բրիտանական Քորնուոլ թերակղզում։
