«Հայաստանի դեմոկրատական» կուսակցության նախագահ Տիգրան Արզաքանցյանը չի մասնակցի 2021թ հունիսի 20-ին ՀՀ-ում կայանալիք արտահերթ խորհրդարանական ընտրություններին։ Կենտրոնական ընտրական հանձնաժողովը, ուսումնասիրելով Տիգրան Արզաքանցյանին ընտրական ցուցակում գրանցելու հարցը, որոշում կայացրեց նրա գրանցումն անվավեր ճանաչելու մասին՝ ներկայացված փաստաթղթերում ներկայացված անճշտությունների պատճառով։
Նշենք, որ օրենքով սահմանված կարգով՝ ընտրություններին կարող են մասնակցել անձինք, որ վերջին չորս տարիներին բնակվում են ՀՀ-ում, մինչդեռ ԿԸՀ-ի հաշվարկներով՝ Արզաքացանցյանը Հայաստանից բացակայել է փաստաղթերի ներկայացման օրվան նախորդող 1461 օրից 1005-ը։
Թեև Արզաքանցյանը տեղեկանք է տրամադրել Մոսկվայի Տեղեկատվական տեխնոլոգիական համալսարանում սովորելու մասին, ինչի պարագայում իր բացակայությունը երկրից հարգելի է համարվում, սակայն տեղեկանքում առկա են եղել անճշտություններ, մասնավորապես, նրա ուսուցման ժամկետները չեն համընկնում՝ ներկայացված բոլոր երեք տեղեկանքներում։ Ներկայացված տեղեկանքներում ոչ միայն յոթ ամսվա տարբերություն կա, այլև՝ փաստաթղթերից մեկում բացակայում է բուհի վավերապայմանները։ Բուհի ռեկտորի կողմից տրամադրված պատասխանում հաստատվել է, որ Արզաքանցյանն ուսումնական հաստատությունում սովորել է, սակայն նշվում է, որ դա եղել է 2011թ սեպտեմբերից մինչև 2017թ սեպտեմբերն ընկած ժամանակահատվածը, որից հետո նա հեռացվել է համալսարանից՝ պայմանագրային պարտականությունները չկատարելու համար։ Բացի դա՝ ԿԸՀ նախագահը նկատեց, որ ներկայացված երրորդ փաստաթղթում կան ակնհայտ կնիքի տարբերություններ, իսկ այդ հարցի շուրջ ԿԸՀ նախագահի կողմից պահանջվող պարզաբանումներին, Արզաքանցյանի ներկայացուցիները չկարողացան պարզաբանել։
