«Առաջին լրատվական»-ի զրուցակիցն է «Քաղաքացիական պայմանագիր» կուսակցության պատգամավորի թեկնածու, Պաշտպանության նախկին փոխնախարար Գագիկ Մելքոնյանը։
-Պարոն Մելքոնյան, երեկ նախկին նախագահ Սերժ Սարգսյանը հրապարակել է ձայնագրություն, որտեղ վարչապետ Փաշինյանը խոսում է ղարաբաղյան կարգավորման մասին։ Ձեր կարծիքով որևէ սենսացիա կա՞ այդ ձայնագրության մեջ։
–Դա հին ձայնագրություն է։ Նոր մենք վարչապետի հետ պարզեցինք, որ դա 2018 թվականի ձայնագրություն է։ Չգիտեմ որտեղից է պեղել ու բերել, իբր ի՞նչ նորություն էր ուզում ցույց տար ինքը։ Այդ ձայնագրությունով ի՞նչ էր ուզում ապացուցել։ Իրենք ուզում են վախեցնել մարդկանց, սա կանենք, նա կանենք, բայց չգիտեն, որ ժողովրդի վախը շուտվանից է բռնած։Հիմա հասել են նրան, որ ասում են՝ կմորթեն։ Բայց ժողովուրդը շատ լավ գիտի, որ այդ մորթողների բրիգադը երբևիցե Հայաստանում չպետք է մնա, պետք է ռադ լինեն գնան։ Ժողովրդին ոչ ոք չի կարող վախեցնել իրենց մորթելով ու պատժելով։
-Ձեր շփումները մարդկանց հետ ի՞նչ են ցույց տալիս, նախկին իշխանավորների մասին ի՞նչ է մտածում հասարակությունը։
-Ժողովուրդը զզված է այդ մարդկանցից՝ հատկապես այդ երկու լիդերից, որոնք մորթում ու պատժում։ Ժողովուրդը ո՛չ լսել ու տեսնել է ուզում նրանց։ Իրենք վախենալու շատ բան ունեն։ Հավաքվում են իրար կողք, իրար դուխ են տալիս, բայց անպայման արժանանալու են ժողովրդի դատաստանին։
-Կարո՞ղ ենք հույս ունենալ, որ այս ընտրությունները գոնե վերջին կռիվը կլինի նախկինների դեմ։
-Այո՛, սա ժողովրդի վերջին կռիվն է։ Մարդիկ պետք է հասկանան, որ հունիսի 20-ով ավարտին են հասցնելու բոլոր հնությունները, նախկիններին։ Թող չիմանան, որ նման պեղումներով ինչ-որ բանի կհասնեն։ Նախկինների էջը փակվում է։
-Խորհրդարան էլ չեն անցի՞։
-Չեմ կարող ասել։ Ուզում են՝ անցնեն, ուզում են՝ չանցնեն, ոչինչ չի փոխվելու։ Բայց իրենք իշխանության են ձգտում, ասում են՝ արդեն իշխանության ենք, պաշտոններ են բաժանում՝ փողերի հետ միասին։
-Խոսում են նույնիսկ երկրորդ փուլի հավանականության մասին։
-Երկրորդ փուլ հնարավոր չէ։ Նախագահական նախկին ընտրությունների ժամանակ Քոչարյանի Դեմիրճյան ավագի ու կրտսերի հետ գնաց երկրորդ փուլ։ Բայց նա արդեն պարտվել էր առաջին փուլում։ Գնաց երկրորդ փուլ ու կեղծարարությամբ անցավ։ Հիմա էլ է նույն բանը փորձում անել, բայց չի ստացվելու։
