Ալբանիայի խորհրդարանը հունիսի 9-ին երկրի նախագահ Իլիր Մետային իմփիչմենտ է հայտարարել Սահմանադրությունը խախտելու համար և նրան հեռացրել զբաղեցրած պաշտոնից, հայտնում է Associated Press-ը:
Իմփիչմենտի օգտին քվեարկել է խորհրդարանի 104 անդամ, դեմ՝ միայն յոթը: Եվս երեքը ձեռնպահ են մնացել:
Այժմ երեք ամսվա ընթացքում պաշտոնից նրա հեռացման մասին որոշմանը պետք է հավանություն տա Ալբանիայի Սահմանադրական դատարանը:
Քվեարկությունը տեղի է ունեցել այն բանից հետո, երբ խորհրդարանական հետաքննությունը հայտնաբերել է, որ Մետան խախտել է Սահմանադրությունն այս տարվա ապրիլին խորհրդարանական ընտրարշավի ժամանակ իշխող Սոցիալիստական կուսակցության նկատմամբ ցուցաբերած «կանխակալ մոտեցմամբ»:
Ապրիլի վերջին խորհրդարանականների խումբը սոցիալիստներից պահանջել է հետաքննություն երկրի նախագահի նկատմամբ, որը շատ տարիներ առաջ լքել է այդ կուսակցությունը՝ Մետային մեղադրելով երկրում անկայունություն և բռնություն հրահրելու, ինչպես նաև ընդդիմության հետ մերձենալու մեջ:
Մետան քննադատել է հետաքննությունը և իմփիչմենտի գործընթացը՝ դրանք համարելով անօրինական:
Ալբանիայում նախագահը կատարում է գլխավորապես արարողակարգային գործառույթներ, բայց օժտված է դատական իշխանությունում և ռազմական ոլորտում որոշ լիազորություններով։