Հունիսի 9-ին Հայաստան է ժամանել ԱՄՆ պետքարտուղարի տեղակալ Ֆիլիպ Ռիքերը, որը այստեղ է ռեգիոնալ այցով ու Երևան գալուց առաջ գտնվում էր Բաքվում: Երևանի ճանապարհին Ռիքերը արել է կարևոր հայտարարություն, ի պատասխան ադրբեջանցի լրագրողների հարցին, թե արդյո՞ք ԱՄՆ-ը հայտնվել է խաղից դուրս վիճակում և հարցերը ռեգիոնում լուծում են Ռուսաստանը, Թուրքիան և Ադրբեջանը: ԱՄՆ բարձրաստիճան դիվանագետը հայտարարել է, որ «Վաշինգտոնը մտադիր է մասնակցել Հայաստանի և Ադրբեջանի միջև հակամարտության լուծումը գտնելու գործընթացին»:
Ռիքերը ասել է, որ այդ մասին հստակ հայտարարել են թե նախագահ Բայդենը, թե պետքարտուղար Բլինքենը: Նահանգները հայտարարել է նաև, որ ԱՄՆ մտադիր է անել դա Մինսկի խմբի համանախագահների հետ համատեղ աշխատանքով: Ռիքերը Բաքվում փաստորեն հայտարարել է, որ Ադրբեջանը հույս չունենա, թե ԱՄՆ լինելու է խաղից դուրս և ռեգիոնալ կառավարումը իրականացվելու է ռուս-թուրքական ձևաչափով, որտեղ Ալիևն իրեն զգում է բավականին հարմարավետ, գոնե մինչ այժմ: Ռիքերը Բաքվից Երևան է եկել փաստորեն այդ ազդակով և Հայաստանը պետք է փորձի առավելագույնս օգտվել այդ հանգամանքից և ԱՄՆ բարձրաստիճան պատվիրակության այցն օգտագործի հայ-ամերիկյան դիվանագիտական-քաղաքական աշխատանքի համար, որը կարող է լինել ԱՄՆ դերի աշխուժացման մեխանիզմներից մեկը: Ռիքերն այսօր բանակցություն կվարի Հայաստանի ղեկավարության հետ, թեև այստեղ կա մի մեծ բաց՝ Հայաստանը չունի արտգործնախարար, հրաժարական է ներկայացրել ԱԳՆ ամբողջ վերադաս կազմը: Արդյո՞ք այդ հանգամանքը խանգարելու է ԱՄՆ պատվիրակության հետ արդյունավետ աշխատանքին, թե՞ Ռիքերի այցը ըստ էության այսպես ասած «հետախուզական» է՝ մասնավորապես Բայդեն-Պուտին հանդիպումից առաջ, որի առնչությամբ ԱՄՆ նախագահը հայտարարել է, թե Պուտինին հստակ հասկացնելու է՝ ԱՄՆ վերադարձել է:
Չի բացառվում, որ Ֆիլիպ Ռիքերի պատվիրակության ռեգիոնալ այցը ունի նպատակներ հենց այդ համատեքստում, մասնավորապես Կովկաս ԱՄՆ վերադարձի հեռանկարի ծավալն ու դինամիկան ճշգրտելու և Պուտինի հետ հանդիպման օրակարգում այդ հանգամանքը ներառելու համար, հատկապես, որ Կովկասի հարցը էապես առնչվում է նաև Իրանի խնդրին և մերձավորարևելյան անվտանգության համակարգին: Այդ իմաստով, այսօր գուցե ԱԳՆ խնդիրը հրամայական չէ, բայց վաղը ԱՄՆ վերադարձի համատեքստում աշխատանքի համար ԱԳՆ անփոխարինելի մեխանիզմ է և հրամայական է այն օր առաջ ուշքի բերելն ու այսպես ասած շարք վերադարձնելը:
