«Առաջին լրատվական»-ի հարցերին պատասխանել է Արցախի ԱԳ նախարար Դավիթ Բաբայանը
ՌԴ ԱԳ նախարար Սերգեյ Լավրովը հայտարարել է, որ Լեռնային Ղարաբաղի կարգավիճակի հարցը լուծված չէ, բայց այս պահին ճիշտ չէ այդ մասին խոսելը, այդ հարցը պետք է լուծվի, բայց ոչ հիմա: Նաև ասել է, որ շեշտը պետք է դնել ոչ թե դրա վրա, այլ տարածխաշրջանը խաղաղ կյանքի վերադարձնելու վրա: Ինչպես եք գնահատում Լավրովի հայտարարությունը՝ հատկապես երեկվա Նիկոլ Փաշինյանի հայտարարության ֆոնին, թե հիմա Արցախի կարգավիճակի հարցի լուծման համար ավելի շատ հնարավորություններ կան, քան տարի առաջ:
Մեզ համար Արցախի կարգավիճակը ղարաբաղա-ադրբեջանական հակամարտության երկու կարևորագույն հարցերից մեկն է: Երկու կարևոր հարց կա՝ կարգավիճակը և սահմանները: Կարգավիճակըի հարցը դեռ լուծված չէ, վերջնական լուծումը կլինի միջազգայնորեն ընդունված ինչ-որ մի տարբերակ, որի պարագայում Արցախը չի լինելու Ադրբեջանի կազմում: Սա մեզ համար անընդունելի է: Ադրբեջանը շարունակում է պնդել, որ չի տեսնում Արցախը Ադրբեջանից դուրս: Այո, սա բարդ գործընթաց և այդ տեսակետից իրատեսական է, երբ Լավրովն ասում է, որ հարցը լուծված չէ և երկար գործընթաց է պահանջվում: Բայց որպեսզի այդ հարցը լուծվի, և Արցախն ունենա ապագա, առաջին հերթին Արցախը պետք է լինի: Հիմա լինելիության խնդիր է, սուբյեկտայնության պահպանման խնդիր է: Հիմա բոլորս աշխատում ենք այդ ուղղությամբ, Արցախն այս ծանրագույն վիճակից դուրս բերելու համար: Այս իմաստով յուրաքանչյուր նորմալ հայի պարտքն է Արցախը դարձնել յուրաքանչյուր հայի համար սրբություն:
Իսկ ինչպե՞ս եք գնահատում նիկոլ Փաշինյանի հայտարարությունը, որ հիմա ավելի մեծ հնարավորություն կա Արցախի կարգավիճակի հարցի լուծման համար, նաև խոսում է «անջատում հանուն փրկության» սկզբունքի մասին:
Այսօր Արցախը շատ ծանր վիճակում է, մենք գտնվում ենք վերակենդանացման բաժանմունքում ու պետք է հիմա ապաքինվենք: Եթե ուզում ենք, որ Արցախն ապաքինվի, ապա նա պետք է սրբություն լինի հայության համար: Այն մարդիկ, որոնք Արցախը կամ նրա որոշ մասեր կհամարեն ադրբեջանական, արցախցիներին կհամարեն թուրք, նրանք պետք է պարտվեն: Այսինքն մենք մեծ աշխատանք ունենք անելու, պետք է սիրել Արցախը:
Դուք կարծում եք, որ Արցախի նկատմամբ մոտեցո՞ւմ է փոխվել:
Ադրբեջանի մոտեցումը չի փոխվել, մեր մոտեցումն էլ չի փոխվել: Ադրբեջանի մոտեցումը չի էլ փոխվելու, Արցախի մոտեցումը նույնպես չի փոխվելու: Ուղղակի կրկնեմ, որ Արցախը պետք է լինի սրբություն: Բայց հայեր մեջ կան մարդիկ, որոնք ասում են, որ Շուշին Շուշա է, Քարվաճառը ադրբեջանական է: Այսինքն մեր խնդիրը ներսում է, ոչ թե դրսից: Եթե Արցախը չլինի, չի լինելու նաև Հայաստան: Թող ոչ ոք իլյուզիաներով չտառապի, թե Արցախը բեռ է: Որովհետև եթե ձերբազատվում եք Արցախից, դուք ձերբազատվում եք վահանից, զրահաբաճկոնից, ոչ թե բեռից: Այդ դեպքում այնպիսի զարգացումներ են լինելու, որ նույնիսկ 1915 թվականը խաղուպար թվա:
Հայտնի է, որ առաջիկայում Բայդեն-Պուտին հանդիպմանը կքննարկվի նաև Արցախի հարցը: Դուք ինչպե՞ս եք դա գնահատում, ի՞նչ ակնկալիքներ կան:
Ցանկացած այդպիսի հանդիպում, հատկապես նման հզոր երկրների ղեկավարների միջև, երկխոսության մի տարբերակ է, իսկ երկխոսությունը միշտ ավելի գերադասելի է, քան առճակատումը: Այդ տեսակետից մենք ողջունում ենք ցանկացած երկխոսություն: