«ԱԱԾ նախկին գեներալը աշխատանքից զրկվելով պարզապես շարունակում է իր գործառույթը։ Նա շարունակում է ռուսաֆիկացնել, ապապետականացնել Հայաստանը։ Նրանք դրա համար են մասնակցում ընտրություններին։ Այն, որ Ռուսաստանը այդ անասնաբույժ չեկիստին է ընտրել Հայաստանը ներկայացնել Սոլովյովի ծրագրում, խոսում է ամեն ինչի մասին։ Վանեցյանը պարզապես կատարում է այն աշխատանքը, որի համար վարձատրվում է»,-«Առաջին լրատվական»-ի հետ զրույցում ասաց Հայաստանի Եվրոպական կուսակցության ղեկավար Տիգրան Խզմալյանը՝ անդրադառնալով Արթուր Վանեցյանի հայտարարությանը։
Հիշեցնենք, որ «Պատիվ ունեմ» դաշինքի ղեկավար, ՀՀ ԱԱԾ նախկին տնօրեն Արթուր Վանեցյանը Մոսկվայում Վլադիմիր Սոլովյովին տված հարցազրույցում մի շարք աղմկահարույց հայտարարություններ է արել։ Նա նախ հայտարարել է, որ Ղրիմը ռուսական է, ապա ասել, որ Ռուսաստանը մեր դաշնակիցն է և ավելի լավ դաշնակից Հայաստանն ունենալ չի կարող։ «Ռուսաստանը չի հանդուրժում սուտասաններին, մարդկանց, ովքեր ուղիղ չեն խոսում հարաբերությունների եւ խնդիրների մասին։ Եվ Ռուսաստանի հետ պետք է հաշվի նստել, դա գերտերություն է։ Եվ ես կարծում եմ, որ իշխանության գալուց հետո մենք պետք է դիտարկենք Ռուսաստանի հետ ավելի սերտ համագործակցության, ավելի խոր ինտեգրացիոն գործընթացների հարցը։ Այնպես անել, որպեսզի Ռուսաստանի եւ Հայաստանի հարաբերությունները լինեն այնպիսի մակարդակի, որպեսզի ոչ ոք չկարողանա փոխել դրանք»,- ասել է Վանեցյանը՝ շտապելով ավելացնել, որ ինքը ռուսական կրթություն ունի, իր համար դա մշակույթի լեզու է և կարծում է, որ ռուսերենի դերը Հայաստանում պետք է բարձրացվի։ «Մեր գլխավոր գործընկերը Ռուսաստանն ու ռուսախոս երկրներն են»,- ասել է Վանեցյանը։
Մեր հարցին՝ ինչպես է գնահատում այն փաստը, որ նման հայտարարություններ է անում մի մարդ, որը հավակնում է դառնալ ՀՀ վարչապետ, Խզմալյանը պատասխանեց.«Նրանք նման հայտարարություններ են անում, որովհետև իրականում ոչ պատիվ ունեն, ոչ խիղճ, ոչ ամոթ։ Նրանք նշանակվել են ժամանակին Ռուսաստանի կողմից, հիմա էլ շարունակում են այդ աշխատանքը։ Դավաճանները կատարում են այն, ինչի համար ստացել են իրենց 30 արծաթը։ Նրանց մանկամիտ սխալն այն է, որ նրանք կարծում են, թե Ռուսաստանը դեռևս կկարողանա որոշել ու իրագործել Հայաստանում։ Ռուսաստանը շուտով սեփական սահմանները չի կարողանա ինքնուրույն գծել։ Եվ մարդիկ, որոնք կապում են մեր երկրի ապագան Ռուսաստանի հետ՝ պետական հանցագործներ են։ Պարոն Վանեցյանը այդ հանցագործների վառ օրինակն է»,-ասաց Խզմալյանը՝ հավելելով, որ սա վերջին ընտրություններն են լինելու Հայաստանում, որոնք անցնելու են Ռուսաստանի թելադրանքի տակ։ «Այս բազմաքանակ ընտրությունները կոչված են ցույց տալու, որ Հայաստանում կա դեմոկրատիա։ Իրականում այստեղ երկու մեծ դաշտ կա։ Մեկը դա ռուսական շահերը պաշտպանող ուժերի դատն է, և մյուսը՝ շատ փոքր, սակայն օրեցօր աճող ազգային և ժողովրդավարական շահերը պաշտպանող դաշտն է։ Ռուսաստանը փորձում է հենց Ռուսաստանում, ոչ թե Հայաստանում ստեղծել տպավորություն, որ ինքը Հայաստանում ունի դաշնակիցներ։ Սոլովյովի հաղորդումը ավելի շատ ռուսական լսարանի համար էր։ Նրանք այնքան են փտել, որ ոչ Քոչարյանը, ոչ Վանեցյանը, ոչ մյուսները ոչ մի բան չեն կարող անել: