Հայաստանում ԱՄՆ դեսպանությունն անդրադարձել է դեսպանի շաբաթներ առաջ Սյունիք կատարած այցին, որը զուգադիպել էր Հայաստանի թե նախագահի, թե վարչապետի սյունիքյան այցերին: «Վերջին շաբաթների ընթացքում մի քանի պարբերականներում նկատել ենք հրապարակումներ ապրիլին դեսպան Լին Թրեյսիի Սյունիք կատարած այցի վերաբերյալ, որոնցում ներկայացվում են սխալ տեղեկություններ։ Դեսպանի՝ Սյունիք կատարած այցը այլ պաշտոնյաների այցերի հետ կապ չուներ, և Սյունիքում գտնվելու ընթացքում դեսպան Թրեյսին չի հանդիպել կամ խոսել վարչապետ Փաշինյանի կամ նախագահ Սարգսյանի հետ։ Ինչպես ավելի վաղ մենք հայտնել էինք, դեսպանը Սյունիքի մարզ էր մեկնել տեղի պաշտոնյաներից և ԱՄՆ դեսպանության ծրագրերի գործընկերներից անձամբ տեղեկանալու համավարակի և պատերազմի կրկնակի հարվածների հետևանքով ստեղծված իրավիճակի մասին։ Դեսպանը նաև հանդիպել էր ԱՄՆ կառավարության դրամաշնորհային ծրագրերի շահառուներին և քննարկել համագործակցության շարունակականությունը ապահովելու ուղիներն՝ ի աջակցություն Սյունիքի վերականգման ու զարգացման», պարզաբանում է տարածել ԱՄՆ դեսպանության ֆեյսբուքյան էջը: ԱՄՆ դեսպանության անդրադարձը ունի ուշադրության անհրաժեշտություն:
Փաստորեն, Նահանգների հայաստանյան դեսպանատունը էական է համարել հայկական մամուլի որոշ միջոցներում տարածվող տեղեկությունները, որոնք փաստորեն նախագահի և Փաշինյանի հետ դեսպանի հանդիպումների մասին ապատեղեկատվությամբ փորձել են այսպես ասած «ինտրիգային քաղաքական համատեքստ» հաղորդել դեսպանի Սյունիք այցին, այդպիսով դրա շուրջ ձևավորելով անառողջ հասարակական-քաղաքական մթնոլորտ և միջավայր, հետագա ներգործության ակնկալիքով: Ընդ որում, շաբաթներ շարունակ պտտվող տեղեկություններում դեսպանատունը թերևս նկատել է հենց միտում, ալիքի դրսևորում, ինչն էլ ստիպել է ի վերջո անդրադառնալ և հերքել տեղեկությունները: Այդ իմաստով հարց է առաջանում, թե ու՞մ էր անհրաժեշտ ստեղծել այդ անառողջ մթնոլորտը ԱՄՆ դեսպանի Սյունիք այցի կապակցությամբ, որտեղ ուշադրության կենտրոնում եղել են առավելապես սոցիալ-տնտեսական խնդիրներ, Սյունիքի հանրության հետ շփումների, աջակցության հնարավորության, կարիքների գնահատում և հետագա ծրագրերի շահառության շրջանակի գնահատում: Ու՞մ է խանգարում ԱՄՆ հետաքրքրությունը Սյունիքի սոցիալ-տնտեսական իրողությունների և իրավիճակի նկատմամբ, որի ուղղությամբ լուծումներում ամերիկյան օժանդակությունը ներկայումս ունի բազմաբնույթ կարևորություն, ոչ միայն սոցիալ-տնտեսական, այլև սոցիալ-հոգեբանական իմաստով, ձեռք բերելով ռազմավարական նպատակ: Ու՞մ է պետք, որպեսզի Սյունիքի առնչությամբ օրակարգը գամված լինի լոկ սահմանային լարված իրավիճակի հիմքով անընդհատ գեներացվող խուճապի նպատակին, և Սյունիքում ռուսական ռազմական ներկայության թեմայի՝ որպես միակ փրկություն և լուծում շրջանառմանն ու ամրապնդմանը: Խոսքն ամենևին այն մասին չէ, որ դրանք անկարևոր թեմաներ ու խնդիրներ են: Խոսքն այն մասին է, որ Սյունիքի օրակարգը միայն դրանց շուրջ պարփակելը ուղղակի նշանակելու է Հայաստանը զրկել լուծումների հարուստ գործիքակազմից և շահերի բազմազանությունից, ինչը հայկական ճկունության և ինքնիշխանության գրավական է: