Նախօրեին Կապանում կայացած հանրահավաքի ժամանակ ՀՀ երկրորդ նախագահ, «Հայաստան» դաշինքի առաջնորդ Ռոբերտ Քոչարյանը հայտարարել է, որ «Գույք պարտքի դիմաց» ծրագիրը հսկայական ներդրումներ է բերել Հայաստան: «Ես արդեն խոսել եմ այս մասին, հայտնել եմ իմ գնահատականը: Ողջ ունեցվածքը, որը կար ծրագրի մեջ, մնացել է Հայաստանում: Դրանց անիվներ չեն կցել և տեղափոխել ՌԴ: Հաստատություններն աշխատում են, հարկեր վճարում, բազմաթիվ աշխատատեղեր են ստեղծվում: Ի՞նչ վատ բան կա գործարքի մեջ: Բոլոր ձեռնարկություններում խոշոր ներդրումներ են կատարվել, տեղադրվել են նոր սարքավորումներ: Կարող եք համարել, որ սա ՌԴ-ից 100 միլիոն դոլարի ներդրում է: Փաստացի, սա է պատկերը»,-հայտարարել է Քոչարյանը։
Տնտեսագետ, «Տնտեսական իրավունքի կենտրոն» ՀԿ նախագահ Մովսես Արիստակեսյանը Քոչարյանի նախընտրական քարոզչությունը համարում է «հանցագործ մարդու կողմից իր մեղքերը արդարացնելու փորձ, որը գիտակից հասարակությունն ընկալում է ըստ այդմ և հասկանում է նրա ստախոսությունը»։
Արիստակեսյանի խոսքով՝ հիմա «գույք պարտքի դիմաց» գործարքը անվանել ներդրում, զավեշտալի է, քանի որ դա վնաս էր մեր տնտեսությանը, դա հարված էր մեր տնտեսության ողնաշարին։ Բացի դա, մեր զրուցակցի խոսքով, Հայաստանը, ըստ էության, պարտք չի ունեցել Ռուսաստանին։ Գնահատված 98 միլիոն դոլարի պարտքը, ըստ Արիստակեսյանի, բնության մեջ չի եղել.«Դա եղել է տնտեսական շահավետ գործարք Ռոբերտ Քոչարյանի, և ինչու չէ նաև Պուտինի, կամ ռուսական կառավարության միջև, որպեսզի Հայաստանի ռազմավարական կարևորագույն նշանակության օբյեկտները անցնեն Ռուսաստանին, որպեսզի Հայաստանը լինի տնտեսական կախվածության մեջ Ռուսաստանից»,-ասաց մեր զրուցակիցը՝ հավելելով, որ Քոչարյանը ստում է՝ պնդելով, թե այդ կարևորագույն օբյեկտները, գործարանները հիմա աշխատում են.«Այո դրանք կարևորագույն գործարաններ էին՝ Մաթեմատիկականը, Մարս գործարանը, թվաբանության ինստիտուտը և մյուսները։ Հիմա դրանք, ըստ էության, ոչ թե աշխատում են իրենց արտադրական նշանակությամբ, այլ դրանց տարածքում գործում են առևտրային բնույթի հաստատություններ, որոնք հարիր չեն արդյունաբերական կոչվող պետությանը։ Այնտեղ ցուցադրություններ են կազմակերպվում և ոչ թե արտադրություն է թողարկվում։ Այնպես որ «Գույք պարտքի դիմաց» գործարքն ապօրինի գործարք էր Քոչարյանի կողմից, որով ապօրինի կերպով ռազմավարական նշանակության օբյեկտներ սեփականաշնորհվեցին։ Ինչպես եղավ Արմենթելի սեփականաշնորհման դեպքում։ Այդ ամենից հետո Քոչարյանը դարձավ «Սիստեմա» ընկերության տնօրենների խորհրդի անդամը՝ դրանով ապահովելով բազմամիլիոն տարեկան եկամուտներ։ Այսինքն նա վաճառեց Հայաստանի ազգային հարստությունը ոչ մի լումա փողի դիմաց, Հայաստանը դարձրեց տնտեսապես կախված Ռուսաստանից, իսկ ինքը դարձավ միլիարդատեր՝ ապահովելով իր զավակների հաջող բիզնես ապագան»,-ասաց տնտեսագետը։
Արիստակեսյանի խոսքով՝ որքան էլ Քոչարյանը փորձի արդարացնել իր հանցավոր գործողութունները, մարդիկ դա հասկանում են և կգնահատեն ըստ արժանվույն. «Հանցագործի տեղը ճաղավանդակների հետևում է։ Մարդասպան հանցագործի տեղը ճաղավանդակների հետրում է։ Նա նպաստեց Հոկտեմբերի 27-ի, Մարտի 1-ի 10 անմեղ զոհերի, իր դասընկերոջ և այլոց սպանություններին, մեծացրեց մեր երկրից արտագաղթի տեմպերը»,-ասաց Արիստակեսյանը։
Մեր դիտարկմանը՝ հիմա Քոչարյանը գործող իշխանություններին է մեղադրում արտագաղթի համար, մեր զրուցակիցը պատասխանեց.«Այո, այս իշխանություններին ես էլ եմ մեղադրում, որ չկարողացան ապացուցել Քոչարյանի, Սերժ Սարգսյանի, ինչու չէ նաև Տեր-Պետրոսյանի իշխանության ժամանակ արտագաղթի բարձր տեմպերի, բանակի կազմականդման, բանակի հզորությունների կրճատման համար։ Այո, ես այս ամենում մեղադրում եմ գործող իշխանությանը, քանի որ դրա համար կային ակնհայտ փաստեր»,-եզրափակեց Արիստակեսյանը:
