«Ակնհայտ է, որ սա մեր ազգային անվտանգության ծառայության բացթողումն է ։ Ես չեմ հասկանում իրենց, հակահետախուզության ֆունկցիան որն է։ Իրենք պետք է կանխարգելեն նման դեպքերը, նման մարդկանց պահեն իրենց տեսադաշտում։ Այդ մասին խոսակցություններ պատերազմի օրերին կային, բայց մենք դրա մասին իմանում ենք պատերազմից 7-8 ամիս հետո։ ԱԱԾ-ն պետք է բացատրություն տա այս ամեն ինչի վերաբերյալ։ Լավ կլինի մի հաղորդագրություն էլ տարածեին ու այս հարցերին պատասխանի, թե ինչով են իրենք զբաղված եղել, որ ինչ որ անձինք անարգել հակառակորդին տվյալներ, կորդինատներ են փոխանցել և պատերազմից առաջ, և պատերազմի բուն ընթացքում»,-«Առաջին լրատվական»-ի հետ զրույցում ասաց իրավապաշտպան Ժաննա Ալեքսանյանը՝ անդրադառնալով ԱԱԾ վերջին բացահայտմանը։
ՀՀ Ազգային անվտանգության ծառայությունը երեկ տեղեկացրեց պետական դավաճանության հերթական դեպքի մասին։ ՀՀ երկու քաղաքացի, հավաքագրված լինելով ադրբեջանական հատուկ ծառայությունների կողմից, պատերազմից առաջ, ապա նաև պատերազմի օրերին մեկնելով Արցախ պարբերաբար կապ են պահպանել Ադրբեջանի հատուկ ծառայությունների աշխատակիցների հետ, նրանցից ստացել կոնկրետ հանձնարարականներ և ցուցումներ, որոնց շրջանակներում լուսանկարել և տեսանկարահանել են ՀՀ ՊՆ զորամասերը, այնտեղ տեղակայված զինտեխնիկան, պարզել զորամասի զինծառայողների քանակը, զորամասի հրամանատարական կազմի անձնական տվյալները, ուսումնական գումարտակների, ինչպես նաև Հայաստանի և Արցախի Հանրապետությունների հակաօդային պաշտպանության համակարգերի տեղակայումները, հատուկ և կարևորագույն օբյեկտների շրջակայքում տեղակայված հակաօդային պաշտպանության միջոցների առկայության վերաբերյալ տվյալները, լուսանկարել և տեսանկարահանել են նաև պետական և ռազմավարական նշանակություն ունեցող հատուկ և կարևորագույն օբյեկտները՝ ջրամբարները, հիդրոէլեկտրոկայանները, ստրատեգիական բարձունքները, պատերազմական գործողությունների ժամանակ պատսպարվելու համար նախատեսված ապաստարանները, զորքերի, զինտեխնիկայի քանակն ու տեղաշարժը, որոնք բջջային հավելվածներով ուղարկել են ադրբեջանական հատուկ ծառայությունների աշխատակիցներին՝ այդ ընթացքում ակտիվացնելով ինտերնետ հասանելիությունը և այդ կերպ հնարավորություն տալով տեղորոշելու հատուկ պահպանվող օբյեկտների տեղակայումների հստակ կորդինատները:
Ըստ ԱԱԾ-ի հենց այդ կորդիանտների պատճառով էլ հակառակորդին հաջողվել է հարավային ուղղությամբ, Հադրութի հատվածում ճեղքել պաշտպանությունը և առաջխաղացում ապահովել։
Ժաննա Ալեքսանյանի համար զարմանալի է, որ այդ անձինք տևական ժամանակ՝ մինչև պատերազմը կարողացել են անարգել հակառակորդի հատուկ ծառայությունների աշխատակիցների հետ կապի մեջ լինել, նրանց տվյալներ փոխանցել, գնալ Թուրքիա, վերադառնալ ու այդպես էլ չհայտնվել մեր ԱԱԾ-ի ուշադրության կենտրոնում։ Կրկնում եմ՝ սա Ազգային անվտանգության ծառայության բացթողումն է, բայց եթե անգամ պատերազմից այսքան ժամանակ անց նման գործ է բացահայտվում, ես մեկ է լավատես չեմ, որ նման գործերով հնարավոր կլինի պատերազմի ժամանակ տեղի ունեցած ամբողջ պատկերը վեր հանել, բացահայտել բոլոր դավաճաններին, քանի որ մինչ օրս էլ դավաճաններ, դավաճանության վերաբերյալ խոսակցությւոնները բամբասանքի մակարդակի են։ Լուրջ աշխատանք չկա բացթողումների վերաբերյալ»,-ընդգծեց իրավապաշտպանը։
Պատերազմի առաջին օրերից ռազմաճակատ մեկնած ազատամարտիկ, Ազատամարտիկների դաշինքի անդամ Վլադիմիր Առաքելյանը մեզ հետ զրուցյում ասաց, որ մի քանի անգամ նայել են ԱԱԾ տեսանյութը, բայց քանի որ անձի դեմքը փակ է, իրենք չեն կարողանում նույնականացնել, հասկանալ, թե ում մասին է խոսքը։ «Ասվում է, որ կամավորական է եղել, կամավորական ջոկատի ինչ որ հրամանատար է։ Կամավորականը բայց լայն հասկացողություն է, ինձ որ ծանոթ չէ նման մարդ։ Ժամանակ է պետք, որ ուսումնասիրենք, պարզենք, թե իրականում դրանք ովքեր են»,-ասաց Առաքելյանը՝ հավելելով.«Բայց եթե պարզվի, հաստատվի դավաճանությունը, գնդակահարություն պետք է լինի։ Պատերազմի կանոններով դավաճանին պետք է կանգնեցնեն պատի տակ ու գնդակահարեն։ Դա աններելի արարք է, ոչ մի ուրիշ պատիժ դրանց համար խիստ չի լինի։ Մենք վերջապես պետք է դավաճանությւնը արմատախիլ անենք էդ տականքների միջից, հայի միջից, ով ընդունակ է նման քայլի։ ԱԱԾ-ն պետք է շատ ուշադիր ու հետևողական լինի նման դեպքերի հարցում»։
Առաքելյանն անթույլատրելիէ համարում այս թեմայով շահարկումները, թե նախընտրական շրջանում շոու է արվում, իրականում նման բան չի եղել և այլն.«Էդ խոսակցութուններն էլ մեր նույն դավաճան ընդդիմության կողմից է տարածվում, բայց դրանց պետք չի լուրջ վերաբերել։ Պետք է լուրջ վերաբերել միայն նման դեպքրեի բացահայտմանը»,-եզրափակեց Առաքելյանը։