Մեզ բոլորիս պարտադրեցին արտահերթ ընտրություններ, հայրենիքի համար այս ծանր օրերին, հայտարարել է «Պատիվ ունեմ» դաշինքի ցուցակում չներառված, բայց փաստացի առաջնորդ Սերժ Սարգսյանը: Երրորդ նախագահը այդ հայտարարությունն արել է դաշինքի նախընտրական ծրագրի շնորհանդեսին: Ստացվում է առաջին հայացքից տարօրինակ իրավիճակ, երբ Սերժ Սարգսյանը մի կողմից մասնակցում է արտահերթ ընտրությանը, մյուս կողմից դժգոհում դրանից: Իսկ ինչո՞ւ նա բաց չթողեց այդ ընտրությունը, եթե համարում էր, որ Հայաստանի համար ծանր պահին այն պետք չէ: Այս հարցին գալու համար, թերևս պետք է գտնենք պատասխան հարցին, թե ում նկատի ունի Սերժ Սարգսյանը՝ «մեզ պարտադրեցին արտահերթ ընտրություն» ասելով:
Նիկոլ Փաշինյա՞նը պարտադրեց: Հազիվ թե: Արտահերթ ընտրությունը դե ֆակտո պարտադրվեց Հայրենիքի փրկության ճակատ կոչվող շարժման գործողություններով, որը սրեց ներքաղաքական ճգնաժամ և հանգեցրեց նրան, որ ի վերջո գործող իշխանությունը գնա արտահերթ ընտրության պայմանավորվածության: Եթե իհարկե Սերժ Սարգսյանին հայտնի է կուլիսային այլ երևույթ, դա այլ հարց է, սակայն առերևույթ առումով, հենց Հայրենիքի փրկության ճակատի գործողություններն էին, որ խորացրին ներքաղաքական քաոս ու ճգնաժամ, հանգեցնելով նրան, որ դրանից ելք դիտվի արտահերթ ընտրությունը: Իհարկե, ՀՓՇ չէր դնում այդպիսի հարց և անգամ հայտարարում էր, թե չի մասնակցի արտահերթ ընտրության, ասելով, որ իր պահանջը անցումային կառավարությունն է առանց խորհրդարանը ցրելու: Բայց, արդեն առաջին մեկ-երկու ամսում պարզ էր, որ Նիկոլ Փաշինյանը չի գնալու այդպիսի համաձայնության, հետևաբար հետագա պայքարն ու ճգնաժամի խորացումը՝ այն էլ հանրային աջակցության բացակայությամբ, առավելագույնը կարող է բերել արտահերթ ընտրության շուրջ փոխզիջման:
Հետևաբար, Սերժ Սարգսյանն ըստ ամենայնի նկատի ունի հենց այն, որ Հայրենիքի փրկության շարժումը «իրենց պարտադրեց» արտահերթ ընտրություն: Իսկ ինչու՞ է Սերժ Սարգսյանը դրանից դժգոհ: Բանն այն է, որ արտահերթ ընտրությանը կարող է փոխվել Հայաստանի թե ներքաղաքական կոնֆիգուրացիան, թե մասնավորապես նաև ուժերի հարաբերակցությունը կառավարող նախկին համակարգում: Այլ կերպ ասած, արտահերթ ընտրությունը կարող է բերել նրան, որ այդ համակարգում Ռոբերտ Քոչարյանը հասնի Սերժ Սարգսյանի նկատմամբ գերակա դիրքի: Եվ սրա համար է նաև, որ լինելով դժգոհ արտահերթ ընտրությունից, Սերժ Սարգսյանն այդուհանդերձ մասնակցում է դրան՝ ձայները Ռոբերտ Քոչարյանին չթողնելու համար: Հնարավոր է նաև, որ «պարտադրեցին» ասելով, երրորդ նախագահ Սարգսյանը նկատի ունի ավելի վեր կանգնած ուժի՝ Մոսկվային, համարելով, որ հենց այդտեղ է հասունացել արտահերթ ընտրության միջոցով Ռոբերտ Քոչարյանի ներքաղաքական դիրքը բարձրացնելու, այսպես ասած ընդդիմության առաջնորդի կարգավիճակի հասցնելու ծրագիրը: