Ռուսաստանի Դաշնության արտաքին գործերի նախարար Սերգեյ Լավրովը հունիսի 7-ին հեռախոսազրույց է ունեցել Ֆրանսիայի Հանրապետության Եվրոպայի և արտաքին գործերի նախարար Ժան Իվ Լը Դրիանի և Գերմանիայի Դաշնային Հանրապետության արտաքին գործերի նախարար Հայկո Մաասի հետ:
Արտաքին քաղաքական գերատեսչությունների ղեկավարները քննարկել են հայ- ադրբեջանական սահմանին և Լեռնային Ղարաբաղի շուրջ ստեղծված իրավիճակը, ինչպես նաև Ադրբեջանի, Հայաստանի և Ռուսաստանի ղեկավարների 2020 թվականի նոյեմբերի 9-ի և հունվարի 11-ի հայտարարությունների դրույթների կատարման ընթացքը:
Կարևորվել է հրադադարի ռեժիմի խիստ պահպանումը և առաջացող տարաձայնությունների քաղաքական-դիվանագիտական ճանապարհով լուծման անհրաժեշտությունը: Նախարարները վերահաստատել են ԵԱՀԿ Մինսկի խմբի դերը Ադրբեջանի և Հայաստանի միջև բանակցային գործընթացում: Ինչպես տեղեկացնում են ՌԴ ԱԳՆ-ից, ռուսական կողմից նշվել է, որ միջազգային կազմակերպությունների ցանկացած ներգրավում հնարավոր է միայն Բաքվի և Երևանի համաձայնությամբ։
