Քարոզարշավի մեկնարկին, Ագարակում կայացած հանդիպման ժամանակ, ՀՀ երկրորդ նախագահ, «Հայաստան» դաշինքի առաջնորդ Ռոբերտ Քոչարյանը հայտարարել է, որ գործող իշխանություններն ունեն աճի ընդամենը երկու ցուցանիշ` գերեզմաններ և միգրացիան:
Ժողովրդագրագետ Արտակ Մարկոսյանը զարմանում է, որ Քոչարյանը հիմա խոսում է միգրացիայից, այն դեպքում, երբ իր կառավարման տարիներին Հայաստանից մշտական հեռացել է 251 հազար մարդ․ «Սրանք պաշտոնական թվեր են, հաստատված վիճակագրությամբ։ Չգիտես ինչի, Քոչարյանը սրա մասի ն մոռացել է և դրա զուգահեռ էլ խոսում է իր կառավարման տարիների բբարձր տնտեսական աճի մասին։ Բայց չի լինում այնպես, որ երկրում լինի բարձր տնտեսական աճ, զարգացում, իսկ մարդիկ արտագաղթեն։ Իրականում Քոչարյանի պաշտոնավարման տարիներին բավականին մեծ ճնշման տակ են եղել, նրանցից բիզնեսներ են խլվել, տնտեսական գործունեության համար դաշտը բարենպաստ չի եղել։ Այսինքն կրկնում եմ՝ չէր կարող լինել 14 տոկոսի տնտեսական աճ և զուգահեռաբար այդքան արտագաղթ։ Աշխարհում նման դեպք երբևէ չի եղել»,-նկատեց Մարկոսյանը։
Մեր զրուցակցի խոսքով՝ երբ Քոչարյանը խոսում է 2004-2005 կամ 2006 թվականների ներգաղթի մասին, ապա դա ներգաղթ չէ։ Դա միայն մեկ բանի մասին էր խոսում՝ սահմանահատումների թվի մասին, որը դրական է եղել և այդ թիվն իրականում կապ չունի իրական միգրացիոն սալդոյի հետ․«Իրական միգրացիոն սալտոն այլ մեթոդաբանությամբ հաշվող գումար է, որը այդ պարագայում՝ 10 տարվա կտրվածքով, բացասական է եղել։ Քոչարյանի կառավարման տարիներին տարեկան մոտ 25 հազար մարդ հեռացել է Հայաստանից։ Ես Գերմանիայից մի կնոջ հետ էի խոսում, որը հենց Քոչարյանի կառավարման տարիներին իր բիզնեսը ճնշելու պատճառով ընդմիշտ հեռացել է Գերմանիա։ Սա է իրականությունը»,-ասաց Մարկոսյանը։
Մեր զրուցակցի խոսքով՝ այնպես չէ, որ 2018-ից հետո արտագաղթ չի եղել, արտագաղթ նվազել է, բայց դրականի չի վերածվել։ 2020 թվականին ունեցել ենք դրական միգրացիոն սալտո 3300-ով, բայց դա եղել է կորոնավիրուսի հետևանքով՝ եղել են փակ սահմաններ, տեղաշարժի սահմանափակում, Ռուսաստանից շատերը վերադարձել էին Հայաստան․«Այնպես որ դեռ շատ աշխատանք կա տանելու, որպեսզի մենք կարողանանք մեր միգրացիոն սալտոն վերածենք դրականի։ Դա շատ լուրջ աշխատանք է պահանջում, ընտրություններից հետո այդ աշխատանքը պետք է տարվի, որովհետև մեր ժողովրդագրական վիճակը շտկելու այլ տարբերակ չկա։ Մանավանդ, որ ժողովրդագրական առումով հիմա ավելի լավ վիճակում ենք, վերջին երկու տարվա ընթացքում վարված քաղաքականությունն իր դրական ազդեցությունը ունենում է։ Ծնունդների բացարձակ թիվը նախորդ տարվա համեմատ աճել է 1005-ով։ Երկրորդ կիսամյակում կպարզվի, թե պատերազմի ազդեցությունն ինչպիսին է եղել, բայց կարծում եմ, որ իրականացվող քաղաքականության պարագայում դրական միտումներ կլինեն։ Միգրացիայի մասով քաղաքականություն դեռ չկա, կարծում եմ, որ ընտրություններից հետո դրան անդրադարձ կկատարվի, քանի որ մեզ ներգաղթ պետք է, մենք պետք է ներգաղթ ապահովենք ու լուծենք մեր բնակչության թվաքանակի աճի միտումները»,-ասաց Մարկոսյանը։
Լուսանկարը՝ panorama.am-ի
