Ֆրանսիայում Google-ին տուգանել են 220 միլիոն եվրոյով

Alphabet Inc.-ի կազմի մեջ մտնող ամերիկյան Google ընկերությունը 220 միլիոն եվրո տուգանք կվճարի ֆրանսիական հակամենաշնորհային կարգավորող մարմնի (Autorite de la Concurrence) պահանջով։ Վերջինս Google-ին մեղադրում էր թվային գովազդի շուկայում իր գերիշխող դիրքը չարաշահելու մեջ, հաղորդում է Interfax գործակալությունը։

Ֆրանսիայի հակամենաշնորհային կարգավորող մարմինը եզրակացրել էր, որ Google-ն, օգտվելով իր դիրքից, խթանում է իր գովազդային ծառայությունները՝ ի վնաս մրցակիցների:

Կարգավորողի հետ համաձայնության շրջանակներում ընկերությունը խոստացել է փոխել իր գործելակերպը՝ բարելավելով Google Ad Manager գովազդային ծառայության փոխազդեցությունը երրորդ կողմերի հետ:

«Google-ին տուգանելու որոշումը հատկապես կարևոր է, քանի որ աշխարհում առաջին անգամ է կարգավորող մարմինը ստանձնում առցանց գովազդի ոլորտում օգտագործվող բարդ աճուրդային ալգորիթմների խնդիրը»,- ասել է Autorite de la Concurrence-ի ղեկավար Իզաբել դե Սիլվան:

Գործակալությունը հայտնում է, որ, ըստ Bloomberg-ի՝ կարգավորող մարմինը Google-ի դեմ գործ է հարուցել 2019 թ.-ին News Corp.-ից, ֆրանսիական Le Figaro թերթից և Rossel La Voix բելգիական մեդիա խմբից ստացված բողոքի հիման վրա։