Կոռուպցիայի կանխարգելման հանձնաժողովը Լևոն Յոլյանի ապօրինի ծագում ունեցող գույքի նյութերն ուղարկել է ՀՀ գլխավոր դատախազություն

«Առաջին լրատվական»-ի տեղեկություններով ՀՀ կոռուպցիայի կանխարգելման հանձնաժողովից Հաշվեքննիչ պալատի նախագահ Լևոն Յոլյանի ապօրինի ծագում ունեցող գույքի նյութերն ուղարկել են ՀՀ գլխավոր դատախազություն:

Ավելի վաղ Կոռուպցիայի կանխարգելման հանձնաժողովը իրականացրել էր  Յոլյանի ու նրա ընտանիքի անդամների հայտարարգրերի վերլուծություն և վերլուծության արդյունքում հայտնաբերված  անճշտությունների և անհամապատասխանություների վերաբերյալ  հանձնաժողովը օրենքով սահմանված կարգով պարզաբանումներ է պահանջել հայտարարագրեր ներկայացնողներից՝ այսինքն Յոլյանից ու նրա ընտանիքի անդամներից: Դրանից հետո օրենքով  սահմանված կարգով վերլուծության անդյունքում ձեռք բերված նյութերը ուղարկվել են  ՀՀ գլխավոր դատախազություն:

Մենք դեռ անցած տարվա հունիսին էինք գրել, որ Կոռուպցիայի կանխարգելման հանձնաժողովը դիմում էր ստացել Լևոն Յոլյանի վերաբերյալ։ Դիմումը վերաբերում էր Լևոն Յոլյանի կողմից դստեր համար գնված թանկարժեք բնակարանին, որը ոչ Յոլյանի, ոչ էլ նրա հետ փոխկապակցված անձի՝ դստեր՝ Աննա Յոլյանի հայտարարագրում արտացոլված չէ։

ՀՀ հաշվեքննիչ պալատի նախագահ Լևոն Յոլյանը դստեր՝ Աննա Յոլյանի համար այդ բնակարանը գնել էր  Բուզանդի 107 հասցեում գտնվող նորակառույց էլիտար շենքի 12-րդ հարկում, որտեղ տեղակայված  են թանկարժեք բնակարաններ : Բնակարանը գնվել է «Դակռուս» ՍՊԸ-ից։ Բնակարանի ընդհանուր մակերեսը 242,5 ք/մ է: Գործարքը կատարվել է  2017 թվականի նոյեմբերի 14-ին, թերևս երբ սկսվել է նորակառույց շենքի շինարարությունը։ Այնուհետև՝ 2019 թվականի հուլիսի 30-ին, կնքվել է սեփականության իրավունքի փոխանցման ակտը, իսկ օգոստոսի 8-ին գործարքը ստացել է պետական գրանցում: Նշենք, որ բնակարանի շուկայական արժեքը կազմում է մոտ 1 միլիոն ԱՄՆ դոլար: Սակայն, ինչպես արդեն նշեցինք, Լևոն Յոլյանի և նրա հետ փոխկապակցված անձանց հայտարարագրերում նշված բնակարանի մասին որևէ տեղեկություն չկա, ինչը հանդիսանում է «Ապօրինի ծագում ունեցող գույքի բռնագանձման մասին» ՀՀ օրենքի շրջանակներում ուսումնասիրության առարկա: