Մեր տեղեկություններով, պետությանը շուրջ 1,5 միլիոն դոլարի վնաս հասցրած և շուրջ 2 տարի հետախուզման մեջ գտնվող ԴԱՀԿ նախկին ղեկավար Միհրան Պողոսյանի՝ ՌԴ Բելգորոդ քաղաքի պետական ազգային հետազոտությունների ինստիտուտում ուսանելու վերաբերյալ տեղեկանքը, որը նա ներկայացրել էր ոստիկանություն՝ որպեսզի ստանա վերջին 4 տարում ՀՀ-ում բնակվելու մասին տեղեկանք, կեղծ է:
Ոստիկանության անձնագրերի և վիզաների վարչությունը հարցում էր ուղարկել Բելգորոդի ինստիտուտ և ահա ստացվել է պատասխանը, ըստ որի, այդ տեղեկանքը կեղծ է, նա որևէ տեղ չի սովորում: Մեր ունեցած տեղեկություններով, ԿԸՀ-ն առաջիկայում այս հիմքով նիստ կգումարի և ըստ ամենայնի, ուժը կորցրած ճանաչի նրա գրանցումը:
Հիշեցնենք, որ նա ընդգրկված է «Պատիվ ունեմ» դաշինքի ցուցակում, 11-րդ հորիզոնականում: Հատկանշական է, որ մինչ այդ Միհրան Պողոսյանը տեղեկանք էր ներկայացրել, թե սովորել է Մոսկվայի պոլիտեխնիկական համալսարանում, սակայն ոստիկանությունը պարզել էր, որ ներկյայացված տեղեկանքներից մեկը ևս կեղծ է: Դրանից Հետո Միհրան Պողոսյանը ներկայացրել էր արդեն երրորդ տեղեկանքը:
Միհրան Պողոսյանն այս պահին էլ գտնվում է հետախուզման մեջ:
