Եվրամիությունում հավանություն են տվել Բելառուսի օդային տարածքով եվրոպական ընկերությունների թռիչքների արգելքին: Համապատասխան արգելքին հավանություն են տվել Եվրամիության անդամ-երկրների պատվիրակները: Այդ մասին հայտնել է Reuters գործակալությունը:
Ըստ այդմ՝ ոչ միայն եվրոպական ավիաընկերությունները թռիչքներ չեն իրականացնի Բելառուսի տարածքով, այլև բելառուսական օդանավերը ևս չեն կարող թռչել Եվրամիության տարածքով կամ վայրէջք կատարել միության օդանավակայաններում:
Այդ կարգը ուժի մեջ կմտնի կեսգիշերից, բայց Բելգիայի կառավարությունը արդեն իսկ արգելել է բելառուսական օդանավերի մուտքը իր օդային տարածք՝ չսպասելով եվրոպական պաշտոնական կարգադրությունների ուժի մեջ մտնելուն: Եվրամիությունում հայտնել են, որ նման որոշումը Բելառուսի նկատմամբ լայնամասշտաբ պատժամիջոցների մի մասն է:
Հիշեցնենք, որ այս պատժամիջոցների պատճառը Ryanair-ի օդանավի հետ կապված միջադեպն է, երբ այն իջեցվել էր, որից հետո ձերբակալվել էր բելառուս ընդդիմադիր լրագրողներից մեկը:
