Ֆրանսիայի համար ընդունելի է սահմանային իրադրության հանգուցալուծման այն առաջարկը, որ արել է Երևանը: Այդ մասին Փարիզում հայ համայնքի ներկայա ցուցիչների հետ հանդիպմանը ասել է Հայաստանի վարչապետի պաշտոնակատար Նիկոլ Փաշինյանը, խոսելով Ֆրանսիայի նախագահ Մակրոնի հետ իր հանդիպման մասին: Հարցը մնում է այն, թե Փարիզի աջակցությունն ինչ արդյունավետությամբ և օպերատիվությամբ կազդի իրավիճակի հանգուցալուծման վրա: Թեմայի շուրջ «Առաջին լրատվական»-ը զրուցել է Շիրինյան-Բաբաջանյան ժողովրդավարների դաշինքի ցուցակը գլխավորող Արման Բաբաջանյանի հետ:
Բաբաջանյանը Ֆրանսիայի աջակցությունը համարեց աննախադեպ․ «Կարևոր է, որ Ֆրանսիան իր պատրաստակամությունը քննարկի Ռուսաստանի հետ: Այն պատկերացումը, որ ուներ Ռուսաստանը, թե Հայաստանը միայնակ է այս ճգնաժամի մեջ՝ ջախջախված է»:
Հարցին, թե մի կողմից Ռոբերտ Քոչարյանը ասում է՝ եթե նպատակ դրեցի ինչ-որ բանի հասնել, ձեզ ոչ մեկիդ հանգիստ չեմ տալու։Մյուս կողմից Փաշինյանը ասում է ոհմակի ատամները փշրելու ենք։ Ինչո՞ւ եք նպաստում այս մթնոլորտի շիկացմանը, Բաբաջանյանը նկատեց․ «Գործ ունենք մարդկանց հետ, ովքեր քրեական լուրջ պատժից են խուսափել․ ընտրությունները սեփական թալանը պահպանելու միջոց են: Միջոցների մեջ խտրություն չդնող Քոչարյանը գնալու է ամենաանկանխատեսելի ու հակապետական քայլերի: Այս ընտրություններով Քոչարյանին ու Սերժ Սարգսյանին պետք է դուրս շպրտել քաղաքական ներկապնակից»: