Խոակին Կապառոսի գլխավորությամբ ֆուտբոլի Հայաստանի ազգային հավաքականը 9-րդ անընդմեջ խաղում դրական արդյունք ցույց տվեց։ Մերոնք ոչ-ոքի խաղացին աշխարհի փոխչեմպիոն Խորվաթիայի հետ։ Հայաստանի հավաքականը մարտական կազմով չէր, մինչդեռ Խորվաթիայի ընտրանին հանդիպումը սկսեց աստղային կազմով, ոսկե գնդակի դափնեկիր Լուկա Մոդրիչի գլխավորությամբ։ Կապառոսը դրսևորվելու հնարավորություն տվեց երիտասարդներին և նորեկներին։ Հիշեցնենք, որ տակտիկական նկատառումներով իսպանացի մասնագետը ազգային թիմ չէր հրավիրել Հենրիխ Մխիթարյանին, Հովհաննես Համբարձումյանին, Սոլոմոն Ուդոյին, Նորբերտո Բրիասկո Բալեկյանին, Ալեքսանդր Կարապետյանին և էլի մի քանի ֆուտբոլիստների։ Վնասվածքի պատճառով երեկ խաղադաշտում չէր Վարազդատ Հարոյանը, իսկ Գևորգ Ղազարյանը թիմին չէր միացել վատառողջ լինելու պատճառով։ Այո, Խորվաթիան ուներ առավելություն և չիրացրեց մի քանի իրական գոլային պահեր, բայց․․․։ Տակտիկական առումով, սակայն Հայաստանի հավաքականը գերազանցեց մրցակցին և խաղավերջում կարող էր նույնիսկ հաղթանակ կորզել։ Առաջին կեսում որոշակի խնդիրներ կային դաշտի կենտրոնում։
Մրցակիցը հեշտությամբ էր մոտենում մեր տուգանային հրապարակին։ Հայաստանի հավաքականի խաղացողներն էլ դժվարությամբ էին անցնում կիսադաշտը, իսկ հարձակվողները՝ որոշակիորեն կտրված էին խաղից։ Երկրորդ կեսում Կապառոսը բեկեց հանդիպման ընթացքը։ Փոխարինման դուրս եկած Անգուլուն, Բիչախչյանը, Շաղոյանը նոր շունչ հաղորդեցին խաղին։ Հենց Շաղոյանի փոխանցումից հետո Անգուլոն դարձավ շքեղ գոլի հեղինակ։ Լավ տպավորություն թողեց նաև հավաքականի նորեկ Դավիթ Տերտերյանը, որը հաջող էր գործում հատկապես մրցակցի գրոհների ժամանակ։ Առանձնացնենք նաև դարպասապահ Դավիթ Յուչենկոյի հերթական վստահ խաղը։ Խաղավարտին Խորվաթիայի հավաքականում խառնաշփոթ էր ստեղծվել։ Դաշտի տերերը, որոնք դուրս էին եկել հեշտ հաղթանակի տանելու ակնկալիքով չէին հավատում, որ կարգով մի քանի անգամ ցածր ֆուտբոլիստները կարող են եղանակ ստեղծել։
Ի դեմս Շաղոյանի Հայաստանի հավաքականն ունի ներկայացուցիչ նաև Հայաստանի առաջին լիգայից։ Կապառոսի հարվածը միլիոնանոց տղաներին դիպուկ էր և ցավոտ։ Վստահաբար կարող ենք ասել, որ Կապառոսի թիմը բացառիկ է և կոլորիտային, որն արդեն իսկ զարմացրել է Եվրոպային։ «Իհարկե գոհ ենք արդյունքից, բայց առաջին հերթին գոհ եմ ֆուտբոլիստների նվիրվածությունից ու խաղադաշտում նրանց վարքագծից:Այն տղաները, որոնք շատ խաղաժամանակ չեն ստացել հավաքականում, շատ բարձր որակի ելույթ ունեցան՝ հաշվի առնելով նաև այն, որ խաղում էինք մի թիմի դեմ, որն աշխարհի փոխչեմպիոն է ու գալիք ԵՎՐՈ 2020-ում ֆավորիտներից է:Այնպես որ, շնորհավորում եմ բոլոր ֆուտբոլիստներին՝ թե՛ նրանց, որոնք խաղացել են, թե՛ նրանց, որոնք չեն խաղացել»,- խաղից հետո ասել է Կապառոսը։
Համեմատության կարգով նշենք, որ այս պահին Խորվաթիայի հավաքական հրավիրված ֆուտբոլիստների տրանսֆերային ընդհանուր արժեքը կազմում է 376 միլիոն եվրո։ Մինչդեռ Հայաստանի հավաքականի տրանսֆերային ընդհանուր արժեքն այս պահին 15 միլիոն եվրո է։ Մեկնաբանությունները կարծում ենք ավելորդ են։ Կապառոսը կրկին ապացուցեց, որ մեծ մարզիչ է, մեծ ստրատեգ։ Ոմանք, զարկ տալով քաղաքական որոշ շրջանակների կողմից Մխիթարյանին հավաքական չհրավիրելու վերաբերյալ կեղծ օրակարգին փորձում էին ստեղծել անառողջ և լարված մթնոլորտ։ Կարկառուն ՀՀԿ-ական Սամվել Ֆարմանյանն էլ հավաքականի տղաներին կոչ էր արել ի նշան բողոքի հրաժարվել խաղադաշտ դուրս գալ։ Երեկ Կապառոսը ցավոտ հարված հասցրեց, որը փորձում էին ներարկել մեր հավաքական։
Ինչևէ, երեք օր անց մեր հավաքականը Ստոկհոլմում երկրորդ ընկերական հանդիպումը կանցկացնի՝ մրցելով Շվեդիայի հետ։ Սա կլինի վերջին հանդիպումը սեպտեմբերին կայանալիք աշխարհի առաջնության ընտրական փուլի խաղերին ընդառաջ։ Նշենք, որ Հայաստանի ազգային հավաքականը երեկ առաջին ընկերական հանդիպումն անցկացրեց։ Մինչ այս իսպանացի մասնագետը փորձարկումների և տակտիկական լուծումներին լիարժեք հնարավորություն չէր ունեցել։