Գիտնականները, այլ ոչ թե հատուկ ծառայությունները, պետք է զբաղվեն COVID-19-ի ծագման պարզմամբ, ասել է Չինաստանի ԱԳՆ ներկայացուցիչ Վան Վենբինը՝ մեկնաբանելով COVID-19-ի արհեստական ստեղծման տարբերակները:
Վերջերս հաճախակի են դարձել արևմտյան երկրների հայտարարությունները կորոնավիրուսի լաբորատոր ծագման հավանականության մասին: Ջո Բայդենի վարչակազմը տարածել է ռելիզ, որտեղ նշել է, որ չի բացառում փորձերի ընթացքում տեղի ունեցած պատահարի պատճառով COVID-19-ի տարածման վարկածը: Նախագահն ինքն 90 օր ժամանակ է տվել ամերիկյան հետախուզությանը՝ այդ վարկածն ուսումնասիրելու համար:
«Անհրաժեշտ է առաջնորդվել միասնությամբ և համագործակցել, այլ ոչ թե դիմադրել, և առավել ևս գործել առանձին երկրների ցանկությամբ: Չինական կողմը հավատարիմ է բաց դիրքորոշմանը և պատրաստ է համագործակցելու. մենք երկու անգամ Չինաստան ենք հրավիրել ԱՀԿ փորձագետների՝ համագործակցելու վիրուսի ծագումը պարզելու համար… Մենք նաև կոչ ենք անում այլ երկրներին ևս Չինաստանի պես թույլ տալ, որ ԱՀԿ մասնագետները գան և ուսումնասիրեն վիրուսի ծագումը»,- ասել է Վան Վենբինը ճեպազրույցում:
Նա շեշտել է, որ վիրուսի առաջացումը գիտական խնդիր է, որը հնարավոր չէ քաղաքականացնել: Դիվանագետը ափսոսանք է հայտնել համավարակի պատճառով Չինաստանի խարանի, պատասխանատվությունը մի կողմ թողնելու և առանձին երկրներին վերագրելու փորձերի, ինչպես նաև վիրուսի ծագումն ուսումնասիրող Առողջապահության համաշխարհային կազմակերպության փորձագետներին ուղղված մեղադրանքների համար։
«Մենք ԱՄՆ-ին և որոշ այլ երկրներին կոչ ենք անում անհապաղ դադարեցնել ծագման քաղաքականացումը, պետք չէ, որ քաղաքական նպատակները խարխլեն՝ վիրուսի աղբյուրը պարզելուն ուղղված միջազգային համագործակցությունը»,- ասել է Չինաստանի ԱԳՆ խոսնակը:
ԱՄՆ Պետդեպարտամենտի նախկին աշխատակից Դեյվիդ Աշերը նշել է, որ Չինաստանի պաշտոնյաները կանխամտածված կերպով գաղտնի են պահել տեղեկությունները կորոնավիրուսից մահվան մասին 2019-ի նոյեմբերին և դեկտեմբերին՝ կորոնավիրուսի դեպքերը ներկայացնելով գրիպի անվան տակ:
Մեծ Բրիտանիայի հետախուզությունն էլ կարծում է, որ նոր կորոնավիրուսի համավարակն իրականում կարող էր առաջանալ Չինաստանի Ուհան քաղաքի վիրուսաբանական համալսարանից հարուցիչի արտահոսքի հետևանքով։
