Վրաստանի ընդդիմադիր «Միացյալ ազգային շարժում» կուսակցությունը, որի հիմնադիրը երկրի նախկին նախագահ Միխեիլ Սաակաշվիլին է, կմտնի խորհրդարան յոթամսյա բոյկոտից հետո:
Այս մասին որոշումն ընդունվել է քաղաքական խորհրդի այսօրվա նիստում։
Այդ մասին տեղեկացրել է «Ազգային շարժման» նախագահ Նիկա Մելիան։
Դրա հետ մեկտեղ, չնայած խորհրդարան մտնելուն, «Ազգային շարժում» կուսակցությունում հայտարարում են, որ չեն ստորագրելու Շառլ Միշելի փաստաթուղթը։
Վրացական ընդդիմությունը սկսել է բոյկոտը 2020 թվականի հոկտեմբերի 31-ի ընտրություններից հետո՝ դրանք համարելով կեղծված: Վեց ամիս անց իշխանությունների և ընդդիմության միջև ստորագրվել է քաղաքական ճգնաժամից դուրս գալու մասին համաձայնագիր, որն առաջարկել էր Եվրախորհրդի նախագահ Շառլ Միշելը: Ապրիլի վերջին խորհրդարան են վերադարձել բոլոր ընդդիմադիրները, որոնք պատգամավորական մանդատներ են ստացել ընտրությունների արդյունքում, բացի «Եվրոպական Վրաստան» կուսակցության և «Միացյալ ազգային շարժում» կուսակցության անդամներից:
2020 թվականի աշնանը տեղի ունեցած խորհրդարանական ընտրությունների արդյունքում «Միացյալ ազգային շարժումը» ստացել է 36 մանդատ։