Այսօր Հայփոստի 10-րդ բաժանմունքում հաճելի իրարանցում էր. մի խումբ լրագրողների, հյուրերի դատին էր ներկայացվելու սպորտային թեմաներով երկու նամականիշ և երկու գեղաթերթիկ` երեքական նամականիշով: Մարվող նամականիշները նվիրված են այս տարվա կարևորագույն միջազգային սպորտային իրադարձություններին եւ մասնավորապես հայ օլիմպիական չեմպիոններին.
-գեղաթերթիկ 3 նամականիշով. օլիմպիական չեմպիոններ.
Վլադիմիր Ենգիբարյան, Ֆաինա Մելնիկ, Յուրի Վարդանյան
-գեղաթերթիկ 3 նամականիշով. 2010 XXI ձմեռային օլիմպիական խաղեր.Վանկուվեր, լեռնադահուկային սպորտ, դահուկավազք
-1 նամականիշ.2010թ. Երիտասարդական օլիմպիական խաղեր, Սինգապուր
-1 նամականիշ.ֆուտբոլի գավաթի աշխարհի առաջնություն, Հարավային Աֆրիկա
Մարման պաշտոնական արարողությանը ներկա էին ՀՀ տրանսպորտի և կապի նախարար Մանուկ Վարդանյանը, ՀՀ սպորտի և երիտասարդության հարցերի փոխնախարար Խաչիկ Ասրյանը, «Հայփոստ Թրասթ Մենեջմենթ» ընկերության տնօրեն Արման Խաչատրյանը, Հայաստանի ֆիլատելիստների Միության նախագահ Հովիկ Մուսայելյանը, Հայաստանի օլիմպիական կոմիտեի ներկայացուցիչներ, հայ օլիպիկական չեմպիոններ, մարմնամարզիկներ:
«Այս օրը առավել ուշագրավ է այն առումով, որ մենք մարում ենք սպորտին նվիրված նամականիշներ, ուշագրավ է նաև այն, որ մենք նամականիշների միջոցով շարունակում ենք մեծարել մեր օլիմպիական չեմպիոններին, մեր մարզիկներին, քանի որ ֆիլատելիստների մոտ ամենաթանկ ոլորտը սպորտին նվիրված ֆիլատելիան է»,-իր խոսքում նշեց ֆիլատելիստների միության նախագահ Հովիկ Մուսայելյանը:
Մինչև տարվա վերջ կմարվեն և շրջանառության մեջ կդրվեն տարբեր թեմաներով ևս 14 նամականիշներ:
