Թբիլիսիի Expo Georgia ցուցահանդեսային կենտրոնում Վրաստանի նախկին վարչապետ Գիորգի Գախարիայի կուսակցության հիմնադիր համաժողովն ընթացել է «Փոխիր» ու «Շարժում հանուն Վրաստանի» ակտիվիստների աղմկոտ բողոքի ակցիայի ֆոնին: Ակցիայի մասնակիցները նրան դիմավորել են սուլոցներով:
Գախարիային համարել են «ամենաանհաջող վարչապետը» ժամանակակից Վրաստանի պատմության մեջ՝ մեղադրելով նրան երկրում վերջին տարիների տնտեսական ծանր իրավիճակի, 2019-ի հունիսի 20-21-ը խորհրդարանի մոտ բողոքի ցույցը ցրելու համար՝ պահանջելով պատասխանատվության ենթարկել նրան: Հիշեցրել են ևս մի քանի աղմկահարույց դեպքեր, որոնք հարուցվել էին Գախարիայի՝ ՆԳ նախարար աշխատելու ընթացքում:
Փողոցում ընթացող բողոքի ակցիայի ֆոնին կայացել է Գիորգի Գախարիայի «Վրաստանի համար» կուսակցության հիմնադիր համագումարը, որին մասնակցել է շուրջ 400 մարդ: Նրանց թվում էին բազմաթիվ նախկին պաշտոնյաներ, գործարարներ, իրավաբաններ:
«Մենք միավորվում ենք հանուն ճշմարտության և գործողության: «Ճշմարտությունն ու գործողությունը» կդառնա կուսակցության հիմնական քաղաքական կարգախոսը»,- ասաց Գախարիան։
