Հայաստանի քաղաքացիների մեծամասնությունը չի պատրաստվում մեկնել երկրից` ոչ մշտական բնակության, ոչ էլ ժամանակավոր աշխատանքի նպատակով: Այս մասին են վկայում Միջազգային հանրապետական ինստիտուտի Խորը վերլուծության կենտրոնի պատվերով՝ Հետազոտական ռեսուրսների կովկասյան կենտրոններ- Հայաստան հիմնադրամի կողմից իրականացված հարցման տվյալները:
Ինչպես հաղորում է «Արմենպրես»-ը, վկայակոչելով «Հայաստանի բնակիչների հանրային կարծիքի ուսումնասիրություն» սոցիոլոգիական հետազոտության զեկույցը, «Հնարավորության դեպքում կմեկնե՞ք մեկ այլ երկիր՝ մշտական բնակության» հարցին հարցվողների 70 տոկոսը պատասխանել է բացասաբար, 5 տոկոսն ավելի շուտ բացասաբար, 5 տոկոսն ավելի շուտ դրական և 17 տոկոսը՝ դրական, իսկ 3 տոկոսը դժվարացել է կամ հրաժարվել է պատասխանել:
«Հնարավորության դեպքում կգնայի՞ք արտերկիր` ժամանակավորապես այնտեղ աշխատելու» հարցին բացասական պատասխան է տվել հարցվողների 57 տոկոսը, 5 տոկոսը պատասխանել է ավելի շուտ բացասաբար, 8 տոկոսը տվել է ավելի շուտ դրական և 28 տոկոսը՝ դրական պատասխան։ Հարցին դժվարացել է կամ հրաժարվել է պատասխանել հարցվածների 2 տոկոսը:
Հայաստանի բնակիչների շրջանում հետազոտության տվյալները հավաքվել են 2021թ. ապրիլի 8-ից մայիսի 4-ի միջակայքում: Հարցման ընտրանքը կազմել է 1502 մարդ: Հայաստանի 5 մարզերում՝ Արարատում, Գեղարքունիքում, Շիրակում, Սյունիքում և Տավուշում անցկացվել են 299 լրացուցիչ հարցազրույցներ՝ մարզային առանձնահատկությունները ներկայացնելու համար: Հարցումն անցկացվել է հեռախոսային զանգերի միջոցով՝ պատահական ընտրանքով: Հետազոտությունն իրականացնողները նշում են, որ վիճակագրական սխալի չափը չի գերազանցում 2.5 տոկոսը:
