ԱՄՆ նախագահ Ջո Բայդենը ուրբաթ ներկայացրել է 2022 ֆինանսական տարվա (սկսվում է 2021 թվականի հոկտեմբերի 1-ից) բյուջետային առաջարկների փաթեթ՝ 6 տրիլիոն դոլարի ծավալով։ Սա դաշնային կառավարության ծախսերի ամենաբարձր ցուցանիշն է Երկրորդ համաշխարհային պատերազմի ավարտի պահից։
Ամերիկյան իշխանություններն առաջարկում են մեծացնել կորպորացիաների հարկումը (21%-ից կդառնա 28%)։ Հարկերի բարձրացումը կանդադառնա նաև բնակչության առավել ապահովված շերտերի վրա։
«Մենք բեկել ենք իրավիճակը՝ կապված պանդեմիայի հետ։ Տնտեսությունն աճում է, ստեղծվում են աշխատատեղեր, սակայն աշխատանքը նոր է սկսվել։ Երկիրը չի կարող պարզապես վերադառնալ մինչճգնաժամային մակարդակի, եթե նախկինի պես լինի անհավասարություն և հին տնտեսության կառուցվածքային թուլությունը»,-նշվում է Սպիտակ տան տարածած հաղորդագրության մեջ։
Հաղորդվում է, որ բյուջեում ներառված է երկու պատմական ծրագիր՝ զբաղվածության աջակցման պլան և ամերիկյան ընտանիքների աջակցման պլան։ Դա վերաբերում է ներդրումներին կրթության, հետազոտության և առողջապահական ոլորտներում։ Կոչ է արվում Կոնգրեսին իջեցնել դեղորայքի գները և մեծացնել ապահովումը բուժապահովագրությամբ։ Աշխատատեղերի ստեղծմանը նախատեսվում է տրամադրել 2․3 տրիլիոն դոլար։ Կնվազեցվի հարկումը երեխաներ ունեցող ընտանիքներից։
