«Քանի որ Վազգեն Սարգսյանի ավանդը հայոց պետականության կայացման գործում, բանակի շինարարության գործում մեծ է եղել և իր մահվանից 22 տարի անց էլ ինքը մնում է քաղաքական գործոն, այս նախընտրական շրջանում երեք նախագահներն էլ նրան փորձում են օգտագործել նախընտրական քարոզչության համար»,-«Առաջին լրատվական»-ի հետ զրույցում ասաց «Հանրապետություն» կուսակցության վարչության անդամ Լևոն Եղիազարյանը՝ անդրադառնալով առաջին նախագահ Լևոն Տեր-Պետրոսյանի կողմից վերջին շրջանում Վազգեն Սարգսյանի մասին արված հայտարարություններին։
Նշենք, որ ՀՀ առաջին նախագահ Լևոն Տեր-Պետրոսյանն նախօրին Հանրային հեռուստաընկերության եթերում ասաց, որ ՀՀ իշխանությունները սխալ են վարվել, որ Արցախյան հիմնահարցում հույսը դրել էին ժամանակի վրա: «Սերժը չհասկացավ, Քոչարյանը չհասկացավ: Վազգեն Սարգսյանն էլ դա չէր հասկացել, որ ժամանակի վրա հույս դնել չի կարելի: Դա այնքան պարզ բան է, որ ես անգամ սկսել եմ վատ զգալ, որ անընդհատ դրա մասին եմ խոսում»,- ասաց նա: Եվս մեկ անգամ անդրադառնալով նախագահի պաշտոնից իր հրաժարականին, նախագահն ասաց. «Եթե ես չհեռանայի ՀՀ-ում քաղաքացիական պատերազմ էր սկսվելու»: Դիտարկմանը, թե Վազգեն Սարգսյանն ասում էր՝ «եթե ինքը մնար, մենք կգնայինք», Տեր-Պետրոսյանն ասաց. «Հետո՞ ինչ, որ հայտարարեց, ե՞րբ հայտարարեց. իմ հրաժարականից հետո: Հիմա դուք Վազգենի ասածը լուրջ եք ընդունո՞ւմ: Վազգենը հասկացել էր իր սխալը, դրա համար մի արդարացում պիտի գտներ, նա շատ լավ հասկացավ դա: Բա ինչո՞ւ Դեմիրճյանի հետ դաշինք կազմեց և փորձեց Քոչարյանին չեզոքացնել»:
Վերջերս էլ իր հոդվածներից մեկում էր առաջին նախագահը խոսել էր Վազգեն Սարգսյանի մասին՝ նշելով, որ վերջինս հասկացել էր իր սխալը արցախյան խնդրի կարգավորման հարցում, բայց արդեն ուշ էր և Հոկտեմբերի 27-ը խանգարեց դրան։
Եղիազարյանը պնդում է՝ այս փուլում առաջին նախագահի կողմից Վազգեն Սարգսյանին ինչ-ինչ քայլեր, արարքներ վերագրելը բացառապես նախընտրական նպատակով է, ինչպես նաև սեփական սխալները արդարացնելու.«Նախագահներից մեկը Վազգենի անունը օգտագործում է իր հեռացումը արդարացնելու համար, մյուսը՝ մշտապես, բոլոր ընտրություններին Վազգենի կերպարը օգտագործել է իր քարոզարշավներում, իսկ երրորդը 22 տարի Վազգենի շիրիմին չի այցելել, բայց մեկ էլ մի քանի օր առաջ գնում և խոնարհվում է»,-ասաց Եղիազարյանը՝ հավելելով, որ Վազգեն Սարգսյանը այն կերպարը չէր, որը կարող էր քաղաքացիական պատերազմ հրահրել։ «7 տարվա մեջ գոնե երեք նման դեպք ինքը կանխել է․ Առաջինը 1990 թվականին իր շնորհիվ էր, որ ՀԱԲԸ զինաթափվեց, երբ իսկապես կար քաղաքացիական պատերազմի, կամ քաղաքացիական բախումների վտանգ։ 1995 թվականին ինքը Վանո Սիրադեղյանի հետ կարողացավ մեկուսացնել դաշնակցության տեռորը, որով նախապատրաստել էին սպանություններ Հայաստանում։ 1996 թվականի հետընտրական զարգացումների ժամանակ հենց Վազգեն Սարգսյանի շնորհիվ էր, որ քաղաքացիական պատերազմ չեղավ։ Վազգեն Սարգսյանը իր երկիրը, իր հայրենիքը այնքան էր սիրում և այնքան պատասխանատու էր, որ երբեք չէր գնա քաղաքացիական պատերազմի։ Ինքը խոստովանել է, որ եթե Տեր-Պետրոսյանը իրեն աշխատանքից ազատեր, ապա ինքը կգնար իր ծննդավայր՝ Դավալու, և կապրեր իր կյանքով»,-ասաց Եղիազարյանը՝ ավելացնելով, որ թյուր են նաև Տեր-Պետրոսյանի այն պնդումները, թե Վազգեն Սարգսյանը մոլորված էր։ «Դա բացարձակ սուտ է։ Որպեսզի Վազգեն Սարգսյանը մոլորվեր, դրա համար հարկավոր էր, որ իրենից ավելի ուժեղ կերպար հայտնվեր, նա լիներ այդ ուժեղ կերպարի ազդեցության տակ։ Իսկ այդպիսին այդ ժամանակահատվածում չկար։ Պարզապես Վազգենը նոր էր հաղթանակ կերտել, նրանում ինքն ու իր ընկերները մեծ ավանդ ունեին և ինքը մտածում էր իր ձևով։ Ես տեղյակ եմ, որ ինքը Տեր-Պետրոսյանից մի քանի անգամ ժամանակ է խնդրել, որպեսզի կարողանա խոսել բանակի հրամանատարների հետ, որոնց համար շատ դժվար էր այդ պահին խոսել հողերի վերադարձի մասին։ Թե չէ Վազգենը չէր կարող մոլորվել։ Նա ամենաճակատագրական պահերին իրեն պահել է խիստ սառնասիրտ, պետականամետ։ Հիմա, երբ Վազգեն Սարգսյանը չկա և չի կարող երեք նախագահներին էլ պատասխանել, նրանք առիթից օգտվում են և ինչ ասես կարող են վերագրել Վազգեն Սարգսյանին»,-ասաց Եղիազարյանը։
Մեր դիտարկմանը՝ ինչպե՞ս է գնահատում այն փաստը, որ Վազգեն Սարգսյանի անունը օգտագործվում է նախընտրական նպատակներով, մեր զրուցակիցը պատասխանեց.«Քանի որ Վազգեն Սարգսյանը իր մահից հետո էլ է քաղաքական դերակատար, քաղաքական գործոն, դրա համար էլ օգտագործում են»։
