ԱՄՆ Ֆլորիդա նահանգի հանրապետական նահանգապետ Ռոն Դեսանտիսը ստորագրել է տուգանքներ սահմանող օրենք այն սոցիալական կայքերի համար, որոնք ամսական ունեն ավելի քան 100 մլն օգտատեր և արգելափակում են նախընտրական քարոզարշավների մասնակիցների օգտահաշիվները,- հաղորդում է Twitter-ը:
«Այսօր Ֆլորիդայի բնակիչները երաշխավորված պաշտպանություն են ստացել խոսքի, մտքի և բովանդակության սահմանափակման դեմ»,- ասվում է հաղորդման մեջ:
Օրենքի համաձայն՝ եթե խոսքը Ֆլորիդայի թեկնածուի մասին է, ապա տուգանքը կազմում է օրական 250 հազար դոլար, 25 հազար դոլար՝ մյուս թեկնածուների դեպքում: Ընդ որում՝ 100 մլն օգտատեր ունեն միայն խոշոր սոցիալական կայքերը՝ Facebook-ն ու Twitter-ը: Օրենքը նաև պարտավորեցնում է սոցիալական կայքերին՝ 7 օր առաջ տեղեկացնել քաղաքական գործիչներին, որ իրենց օգտահաշիվները կարող են արգելափակվել: Օգտատերերը կարող են դատի տալ սոցիալական կայքերին նման խախտումների դեպքում:
Ինչպես հաղորդում է CNN-ը՝ նմանատիպ օրենսդրական առաջարկներ են քննարկվում նաև Արքանզաս, Կենտուկի, Օքլահոմա և Յութա նահանգներում:
Հիշեցնենք՝ սոցիալական կայքերը քննադատության թիրախ դարձան, երբ արգելափակեցին նախկին նախագահ Դոնալդ Թրամփի օգտահաշիվները հունվարի 6-ին Կապիտոլիումի վրա հարձակումից հետո: Twitter-ը հայտարարել է, որ այդ օգտահաշիվը արգելափակել է մեկընդմիշտ, իսկ Facebook-ը դեռ չի վերաբացել:
