Ամեն ինչ անելու ենք Նիկոլ Փաշինյանի վարկանիշը «մինչև քոքը» նվազեցնելու համար, նախօրեին ասուլիսում հայտարարել է երկրորդ նախագահ Ռոբերտ Քոչարյանը: Նա փաստորեն բաց տեքստով ասել է իր գլխավոր անելիքը, բացահայտել ընտրական գլխավոր մարտավարությունը: Այդ մարտավարության և դրա շարժառիթի մասին խոսել եմ դեռևս ամիսներ առաջ, երբ ձևավորվում էր իշխանության դեմ հետպատերազմական պայքարի միասնական ճակատ: Նույն խնդիրը հետապնդում էր ճակատը՝ նվազեցնել Նիկոլ Փաշինյանի վարկանիշը, այլ ոչ թե աշխատել սեփական վարկանիշը բարձրացնելու ուղղությամբ: Այժմ երկրորդ նախագահ Ռոբերտ Քոչարյանը արտահերթ ընտրության գործընթացում բարձրաձայնում է այդ պլանի մասին՝ գլխավոր խնդիրը ոչ թե իր վարկանիշը բարձրացնելն է, այլ Նիկոլ Փաշինյանի վարկանիշը առավելագույնս նվազեցնելը, զրոյացնելը:
Բանն այն է, որ այդ խնդիրը լուծելու դեպքում առաջանում է մի իրավիճակ, երբ քաղաքական դաշտում այլևս չկա մեծ կամ մրցունակ վստահելիությամբ այլ գործիչ կամ ուժ: Անկասկած է, որ մնացյալ գործիչներն ու ուժերը իրենց վարկանիշով գոնե առայժմ գտնվում են մի տիրույթում, որը Ռոբերտ Քոչարյանի կամ նախկին կառավարող համակարգի համար միանգամայն հասանելի է և ավելին՝ շատ գործիչների և ուժերի դեպքում անգամ միանգամայն հաղթահարելի:
Ռոբերտ Քոչարյանը հիանալի է պատկերացնում, որ իր այսպես ասած «հակավարկանիշը» բավականին բարձր է և այն մաշելու համար աշխատելը չափազանց բարդ, տարիների գործ է, այն էլ առանց հաջողության շոշափելի երաշխիքի, անգամ եթե հաջողվի զրոյացնել Նիկոլ Փաշինյանի վարկանիշը: Որովհետև դրանից երկրորդ նախագահի համար ինքնաբերաբար չի բխում սեփական վարկանիշի աճ: Բայց, նա փաստորեն մարտավարական իմաստով արձանագրում է, որ դա իրեն պետք չէ: Դա պրագմատիկ հաշվարկ է: Նրան պետք է չեզոքացնել գլխավոր խնդիրը՝ Փաշինյանը վարկանիշը, և արդեն այսպես ասած համահարթ դաշտում իրացնել իր համակարգային և ռեսուրսային առավելությունը: Այստեղ առաջանում է մի հատկանշական հարց՝ ինչո՞ւ է երկրորդ նախագահը բարձրաձայնում, բացահայտում այդ մարտավարությունը: Մի կողմից, իրավիճակն այդ առումով այնքան պարզ է, որ թաքցնելու բան չկա էլ: Մյուս կողմից, այստեղ գուցե հարկ է դիտարկել հավանականությունը, որ Ռոբերտ Քոչարյանը այդպիսով ազդակ է հղում արտաքին որոշակի շրջանակների, այն ուղենշով, թե որն է գլխավոր խնդիրը և ինչ պետք է անել՝ անել ամեն ինչ Փաշինյանի վարկանիշը «մինչև քոքը» մաշելու համար: Ի դեպ, այդ իմաստով էլ ուշագրավ է հետևել Ադրբեջանի գործողություններին:
Լուսանկարը՝ panorama.am-ի