Արդեն շուրջ երկու շաբաթ է Ադրբեջանի զինված ուժերը շարունակում են գտնվել Հայաստանի Հանրապետության տարածքում. այս զարգացումները տեղի են ունենում ՀՀ ռազմավարական դաշնակցի, ՀԱՊԿ անդամ երկրների և տարածաշրջանային երկրների թողտվությամբ և համաձայնությամբ: Այս համատեքստում տեղին է հիշել, որ Իրանը բազմիցս հայտարարել է, որ Հայաստանի Հանրապետության սահմանը կարմիր գիծ է Իրանի համար: Մի կողմից հասկանալի է, որ Իրանում ներքաղաքական բարդ իրավիճակ է՝ կապված առաջիկա ընտրությունների հետ, մյուս կողմից Հայաստանը չունի անվտանգային որևէ պայմանագիր այս երկրի հետ, ինչպես օրինակ Ռուսաստանի պարագայում, բայց իրանական կողմը բազմիցս ասել է, որ Հայաստան-Իրան սահմանը մեծ նշանակություն ունի:
Ուշագրավ է նաև, որ Վիեննայում ընթացող բանակցությունների ժամանակ արևմտյան երկրների ներկայացուցիչները համաձայնել են չեղարկել Իրանի դեմ պատժամիջոցները: Ռոհանին հայտնել է, որ պայմանավորվածություն են ձեռք բերել Իրանի միջուկային պայմանագրի հիմնական կետերի շուրջ: Այս և տարածաշրջանային կարևորության մի շարք հարցեր «Առաջին Լրատվական»-ը քննարկել է արևելագետ Արմեն Պետրոսյանի հետ: «Ընդհանուր առմամբ այն, ինչ տեղի է ունենում Սյունիքում և ընդհանրապես հետպատերազմյան շրջանում, թշնական օրակարգի մի բաղադրիչն է, որի թիրախներից մեկն էլ առաջին հերթին Հայաստանին, հայ հասարակությանը ցույց տալն է, որ մեր անվտանգային միջավայրը, վերջսինիս ռազմաքաղաքական բովանդակությունը իբր անօգուտ է, իսկ երկրորդը՝ հավելյալ խնդիրներ առաջացնելը Հայաստանի և ռազմավարական դաշնակցի միջև: Սա քաղաքական օրակարգի մի մաս է»,-ասաց Պետրոսյանը:
Ինչ վերաբերում է Իրանի դիրքորոշմանը, մեր զրուցակիցը փաստեց, որ Թեհրանի դերակատարումը խիստ սահմանափակ է՝ իրավական և քաղաքական առումներով: «Գիտենք, որ քաղաքական առումով ՀՀ-ն հանդիսանում է ՌԴ-ի շահերի գոտի, նաև անվտանգային առումով՝ մաս կազմելով Ռուսաստանի նախաձեռնած անվտանգային ձևաչափին: Մյուս կողմից, իրավական առումով որևէ առարկայական հնարավորություն չկա, որպեսզի Իրանն իր շահերը, նախկինում հնչեցրած հայտարարությունները ավելի առարկայական դարձնի»:
Առավել մանրամասն՝ տեսանյութում: