ԱՄՆ-ում Moderna և Pfizer/BioNTech ընկերությունների ստեղծած կորոնավիրուսի դեմ պատվաստանյութերով պատվաստումից հետո մի քանի դեռահասների և երիտասարդների մոտ սրտի խնդիրներ են առաջացել։ Այս մասին հայտնում է The New York Times պարբերականը։
Պատվաստվողներից մի քանիսի մոտ ի հայտ է եկել միոկարդիտ՝ սրտամկանի բորբոքում, որը կարող է առաջանալ որոշակի վարակներից հետո։
Ըստ լրատվամիջոցի՝ պատվաստանյութի երկրորդ դեղաչափը ստանալուց 4 օր անց ստացվել են կողմնակի ազդեցությունների մասին հաղորդումներ։ ԱՄՆ-ի Հիվանդությունների վերահսկման և կանխարգելման կենտրոնն ուսումնասիրում է տվյալ կողմնակի ազդեցությունների առաջացման վերաբերյալ տվյալները։ Կողմնակի ազդեցություններն ավելի շատ եղել են տղաների, քան աղջիկների մոտ։ Մասնագետները դեռ պարզում են՝ արդյո՞ք միոկարդիտի դեպքերը կապված են պատվաստման հետ, թե՞ պարզապես համընկնում են։
Մասնագետները բժիշկներին կոչ են արել աչալուրջ լինել երիտասարդների մոտ պատվաստումից հետո առաջացած սրտի արտասովոր ախտանիշների առումով։
ԱՄՆ-ում Pfizer և BioNTech ընկերությունների համատեղ ստեղծած պատվաստանյութի կիրառումը 12-15 տարեկանների շրջանում թույլատրվել է մայիսի 10-ից։
